சென்னை: 12 ஆண்டுகளுக்குப் பிறகு மகாபலிபுரத்தில் வன்னியர் சங்கம் நடத்தும் சித்திரை முழு நிலவு மாநாடு மிகப்பெரிய அளவில் நடைபெற உள்ளது. இதற்கான ஏற்பாடுகளை வன்னியர் சங்கத்தினரும் பாட்டாளி மக்கள் கட்சியினரும் தீவிரமாக மேற்கொண்டு வருகின்றனர். இந்த மாநாட்டை மே மாதம் 11ம் தேதி செங்கல்பட்டு மாவட்டம் மாமல்லபுரத்தில் நடத்த திட்டமிடப்பட்டுள்ளது. விழா குழு தலைவராக பாமக இளையணித் தலைவர் அன்புமணி ராமதாஸ் நியமிக்கப்பட்டுள்ளார். பந்தல்கால் ஊன்றும் பணிகள் தொடங்கியுள்ளன.
வன்னியர் சங்கத்தையும் பாமக கட்சியையும் தொடங்கியவர் ராமதாஸ்தான். தற்போது பாமக தலைவராக அன்புமணி செயல்பட்டு வருகிறார். வன்னியர் சங்கத்தின் தலைவராக இருந்த காடுவெட்டி குரு மறைந்தபின், அந்த பொறுப்பை அருள்மொழி ஏற்றுள்ளார். கடந்த பல ஆண்டுகளாக பாமகவும் வன்னியர் சங்கமும் இணைந்து சித்திரை முழு நிலவு மாநாட்டை நடத்தி வந்த நிலையில், கடந்த சில ஆண்டுகளாக ஏற்படும் பிரச்சனைகள் காரணமாக இந்த மாநாடு நடைபெறவில்லை. இம்முறை அந்த இடைவெளியை முடிவுக்கு கொண்டு வந்து, வெகு விமரிசையாக நிகழ்வை நடத்த திட்டமிடப்பட்டுள்ளது.
இந்த சூழலில், விடுதலைச் சிறுத்தைகள் கட்சித் தலைவர் திருமாவளவனுக்கு பாமக உறுப்பினர்கள் நேரில் சென்று அழைப்பிதழை வழங்கினர். அரக்கோணத்தில் நடைபெற்ற இந்த சந்திப்பில், திருமாவளவனுக்கு பாமக தரப்பினர் சால்வை அணிவித்து மரியாதை செலுத்தியபோது, அவர் சிரித்த முகத்துடன் அழைப்பிதழை ஏற்றுக்கொண்டதாக கூறப்படுகிறது. மேலும், அவர் மாநாடு வெற்றியடைய வாழ்த்து தெரிவித்ததாக பாமகவினர் தெரிவித்துள்ளனர்.
பின்னர் திருமாவளவன், பாமகவினர் வழங்கிய அழைப்பிதழுடன் புகைப்படம் எடுத்துக்கொண்டார். தற்போது அந்த புகைப்படங்கள் சமூக வலைதளங்களில் வைரலாகி வருகின்றன. அரசியல் ரீதியாக நேர்மறையான விழுப்புணர்வை வெளிப்படுத்தும் இந்த நிகழ்வு, பாமகவும் விசிகவும் சில விவகாரங்களில் கடுமையான எதிர்ப்பை பகிர்ந்தாலும், ஒருவருக்கொருவர் மரியாதை செலுத்தும் நாகரிக அரசியல் நடைமுறையைப் புகழ்ச்சி பெறச் செய்துள்ளது.
மாநாட்டிற்கான ஏற்பாடுகள் மாநிலம் முழுவதும் தீவிரமாக நடைபெற்று வருகின்றன. பாமகவினர் கட்சி தலைவர்களும், பொதுமக்களும் உள்ளிட்ட பலரிடம் நேரில் சென்று அழைப்பிதழ் வழங்கி வருகின்றனர். இதையொட்டி, பாமக நிறுவனர் ராமதாஸ், அனைத்து சமூகத்தினருக்கும் அழைப்பு விடுத்துள்ளார். வன்னியர் சங்க மாநாடு யாருக்கும் எதிரானதல்ல என்றும், ஒற்றுமையை வலியுறுத்தும் நிகழ்வாகும் என்றும் அவர் தெரிவித்துள்ளார்.
