சென்னை: ஆந்திர மாநிலம் கண்டலேறு அணையில் தண்ணீர் இல்லாததால் சென்னையின் குடிநீர் தேவையை பூர்த்தி செய்ய ஜூலை மாதம் முதல் திறக்கப்படும் கிருஷ்ணா நதிநீரில் முதல் தவணை தண்ணீர் திறக்க வாய்ப்பில்லை என தமிழக நீர்வளத்துறை அதிகாரிகள் தெரிவித்தனர்.
சென்னையின் குடிநீர் தேவைக்காக 15 டிஎம்சி (ஒரு டிஎம்சி ஆயிரம் மில்லியன் கன அடி) கிருஷ்ணா நதி நீரை வழங்கும் திட்டம் 1983 ஏப்ரல் 18 அன்று தமிழ்நாடு மற்றும் ஆந்திரா இடையே இறுதி செய்யப்பட்டது. அதன்படி கால்வாய் வழியாக கிருஷ்ணா நீர் வரும்போது ஆவியாகி 3 டிஎம்சி இழப்பு ஏற்படுகிறது. அதேபோல் ஆந்திர அரசு 12 டிஎம்சி தண்ணீரை வழங்க வேண்டும்.
ஆண்டுதோறும் ஜூலை முதல் அக்டோபர் வரையிலான 4 மாதங்களில் முதல் தவணை 8 டிஎம்சி தண்ணீரும், ஜனவரி முதல் ஏப்ரல் வரை 4 மாதங்களில் 2வது தவணை 4 டிஎம்சி தண்ணீரும் வழங்கப்படும். சென்னையின் குடிநீர் தேவைக்காக கிருஷ்ணா நதிக்கால்வாய் மூலம் 1996-ம் ஆண்டு முதன்முறையாக கிருஷ்ணா நதி நீர், திருவள்ளூர் மாவட்டம் ஊத்துக்கோட்டை அருகே உள்ள தாமரைப்பாக்கம் ஜீரோ பாயின்ட்டை அடைந்தது. சென்னையின் குடிநீர் தேவைக்காக பூண்டி ஏரிக்கு வரும் கிருஷ்ணா நீர் அங்கிருந்து குழாய் மூலம் செம்பரம்பாக்கம், சோழவரம், புழல் ஏரிகள் வழியாக செல்கிறது. 1996 முதல் தற்போது வரை 112.258 டிஎம்சி கிருஷ்ணா நீர் பெறப்பட்டுள்ளது. கடந்த ஆண்டு 2.412 டிஎம்சி தண்ணீர் கிடைத்தது.
தற்போது சென்னைக்கு குடிநீர் வழங்கும் ஏரிகளின் நீர் இருப்பு மற்றும் சென்னை நகரின் குடிநீர் தேவையை கருத்தில் கொண்டு முதல் தவணையாக கிருஷ்ணா நதி நீரை திறந்து விட வேண்டும் என ஆந்திர அரசுக்கு தமிழக அரசு கோரிக்கை விடுத்துள்ளது. இதுகுறித்து தமிழக நீர்வளத்துறை அதிகாரிகள் கூறுகையில், “ஆந்திராவின் சோமசீலா அணையில் இருந்து கிருஷ்ணா நதி நீர் கண்டலேறு அணைக்கு வருகிறது. சைலம் அணையில் இருந்து சென்னையின் குடிநீர் தேவைக்காக கண்டலேறு அணையில் இருந்து தண்ணீர் திறக்கப்படும்.
இந்த அணையில் 9 டி.எம்.சி.க்கு மேல் தண்ணீர் இருந்தால் தான், கிருஷ்ணா கால்வாயில் தண்ணீர் திறக்க முடியும். 68 டிஎம்சி கொள்ளளவு கொண்ட கண்டலேறு அணையில் நேற்றைய நிலவரப்படி 8.42 டிஎம்சி தண்ணீர் மட்டுமே உள்ளது. எனவே சென்னையின் குடிநீர் தேவைக்காக முதல் தவணையாக கிருஷ்ணா நீரை திறக்க வாய்ப்பில்லை.
