மேட்டூர் / தருமபுரி: மேட்டூர் அணைக்கு நீர் வரத்து குறைந்ததால், காவிரி ஆற்றில் தண்ணீர் திறப்பு வினாடிக்கு 48,000 கன அடியாகக் குறைக்கப்பட்டுள்ளது. கேரளா மற்றும் கர்நாடகாவில் பெய்த கனமழையால், அங்குள்ள அணைகள் நிரம்பியன. அதைத் தொடர்ந்து, அணைகளில் இருந்து உபரி நீர் திறக்கப்பட்டதால், மேட்டூர் அணைக்கு நீர் வரத்து அதிகரித்தது. இதனால், மேட்டூர் அணை நேற்று மாலை 6 மணிக்கு 44-வது முறையாக அதன் முழு கொள்ளளவான 120 அடியை எட்டியது.
இதையடுத்து, அணையைப் பாதுகாக்க அணைக்கு வரும் அனைத்து நீரும் திறக்கப்பட்டது. நேற்று முன்தினம் மாலை வினாடிக்கு 57,732 கன அடியாக இருந்த நீர் வரத்து நேற்று காலை வினாடிக்கு 58,000 கன அடியாக அதிகரித்தது. ஆனால், நேற்று மதியம் 48,000 கன அடியாகக் குறைந்தது. அணையிலிருந்து வினாடிக்கு 58,000 கன அடி நீர் திறந்து விடப்பட்ட நிலையில், நேற்று மதியம் முதல் அது 48,000 கன அடியாகக் குறைக்கப்பட்டது. மேட்டூர் அணையின் நீர்மட்டம் 120 அடியாகவும், நீர் இருப்பு 93.47 டிஎம்சியாகவும் உள்ளது.
அணையின் சுரங்கப்பாதை மின் நிலையம் வழியாக 22,500 கன அடி நீரும், 8 கண் மதகு வழியாக 2,500 கன அடி நீரும், உபரி நீரை வெளியேற்றும் 16 கண் மதகு வழியாக 23,000 கன அடி நீரும் திறந்து விடப்படுகிறது. அணையிலிருந்து அதிக அளவு தண்ணீர் திறந்து விடப்பட்டதால், காவிரி கரையோர மக்களுக்கு வெள்ள எச்சரிக்கை விடுக்கப்பட்டுள்ளது. மேட்டூர் அணையில் இருந்து வெளியேறும் உபரி நீரைப் பார்க்க நகருக்கு வெளியே இருந்து ஏராளமான மக்கள் வந்தனர்.
புதிய காவிரி பாலத்தில் கூட்டம் போக்குவரத்துக்கு இடையூறு ஏற்படுத்தியது. தர்மபுரி மாவட்டத்தில் உள்ள ஒகேனக்கல் காவிரி ஆற்றில், நேற்று முன்தினம் காலை 65 ஆயிரம் கன அடியாக இருந்த நீர்வரத்து, மாலையில் 50 ஆயிரம் கன அடியாகக் குறைந்தது. நேற்று காலை, நீர்வரத்து 43 ஆயிரம் கன அடியாகக் குறைந்தது. இந்நிலையில், நேற்று மாலை சுமார் 5 மணியளவில் நீர்வரத்து வினாடிக்கு 50 ஆயிரம் கன அடியாக அதிகரித்தது.
