திருநெல்வேலி மனோன்மணியம் சுந்தரனார் பல்கலைக்கழகத்தின் கீழ் நெல்லை, தென்காசி, தூத்துக்குடி மற்றும் கன்னியாகுமரி மாவட்டங்களில் 106 கல்லூரிகள் இயங்கி வருகின்றன. இந்தக் கல்லூரிகளில் தற்போது செமஸ்டர் தேர்வுகள் நடைபெற்று வருகின்றன. கடந்த 27-ம் தேதி நடைபெறவிருந்த தொழில்துறை சட்டப் பாடத் தேர்வுக்கான வினாத்தாள் பெரும் பரபரப்பை ஏற்படுத்தியது.
அன்றைய தினம் தேர்வு ரத்து செய்யப்பட்டது. மேலும், புதிய வினாத்தாள் தயாரிக்கப்பட்டு நேற்று முன்தினம் மறு தேர்வு நடத்தப்பட்டது. இதனிடையே, பல்கலைக்கழகத் தேர்வு வினாத்தாள் கசிவு குறித்து விசாரணை நடத்தி நடவடிக்கை எடுக்கக் கோரி பல்கலைக்கழக பதிவாளர் சாக்ரடீஸ் நெல்லை பேட்டை காவல் நிலையத்தில் புகார் அளித்துள்ளார். அதில், “கடந்த 27-ம் தேதி நடைபெறவிருந்த தொழில்துறை சட்டப் பாடத்திற்கான வினாத்தாள், 26-ம் தேதி இரவு 10 மணிக்கு பல்கலைக்கழக தேர்வு ஆணையரின் செல்போனுக்கு வாட்ஸ்அப்பில் அடையாளம் தெரியாத ஒருவரால் அனுப்பப்பட்டது.
இதன் விளைவாக, தேர்வு ரத்து செய்யப்பட்டது. வினாத்தாள் கசிவுக்கு காரணமானவர்கள் மீது உரிய நடவடிக்கை எடுக்க வேண்டும்” என்று அவர் தெரிவித்துள்ளார். புகாரின் அடிப்படையில், பேட்டை போலீசார் தமிழ்நாடு அரசு பொதுத் தேர்வுகள் சட்டம் பிரிவுகள் 316 (குற்றவியல் நம்பிக்கை மீறல்), 318 (மோசடி), 3(5) மற்றும் தமிழ்நாடு அரசு பொதுத் தேர்வுகள் சட்டம் 3, 4 மற்றும் 5 (தேர்வு முறைகேடு) ஆகியவற்றின் கீழ் வழக்குப் பதிவு செய்து விசாரித்து வருகின்றனர்.
