வருமான வரி தாக்கலுக்கான இணையதளம் திறக்கப்பட்டுள்ள நிலையில், பலரும் தாக்கலை துவங்கத் தயாராக இருக்கின்றனர். ஆனால், வருமான வரி நிபுணர்கள் மற்றும் அதிகாரப்பூர்வ வட்டாரங்கள் கூறுவதுபோல், ஜூன் 15க்குப் பிறகே தாக்கல் செய்வது மேலதிக நன்மைகளைத் தரும். காரணம், Form 16 மற்றும் TDS சான்றிதழ்கள் அனைத்தும் ஜூன் 15க்குள் நிறுவனங்கள் வழங்கும் கட்டாயம் உள்ளது. இது இல்லாமல் தாக்கல் செய்வது தவறான கணக்கீடுகளுக்கு வழிவகுக்கும்.
பழைய வரி முறையை பின்பற்றுபவர்கள் 2.5 லட்சம் வருமானத்திற்கு வரி செலுத்த தேவையில்லை. 2.5 லட்சம் முதல் 5 லட்சம் வருமானத்திற்கு 5%, 5 லட்சம் முதல் 10 லட்சம் வருமானத்திற்கு 20%, 10 லட்சத்திற்கு மேல் 30% வரி விதிக்கப்படுகிறது. 80C, 80D போன்ற பிரிவுகளின் கீழ் தள்ளுபடி பெற முடியும். சிலர் 7 லட்சம் வரை வருமானம் பெறும்போது முழுமையாக வரிவிலக்கு பெறுகிறார்கள்.
புதிய வரி முறையை தேர்ந்தெடுத்தவர்கள் ₹12 லட்சம் வருமானம் வரை வரியின்றி இருக்க முடியும். புதிய வரி விகிதப்படி, ₹4 லட்சம் வருமானத்திற்கு வரி இல்லை. அதற்கு மேல் படிப்படியாக 5%, 10%, 15% என்று 30% வரை வரி உயருகிறது. ₹24 லட்சம் வருமானத்திற்கு மேல் வருமானம் இருந்தால் அதிகபட்சமாக 30% வரி விதிக்கப்படும்.
இப்போது ITR-1 மற்றும் ITR-4 பக்கங்கள் செயல்பாட்டில் உள்ளன. சம்பளதாரர்கள், HUF கள் மற்றும் சிறிய நிறுவனங்கள் ITR தாக்கல் செய்யலாம். ஆனாலும் Form 16 இல்லாமல் தாக்கல் செய்தால் வருமானம் குறைவாக கணக்கீடு செய்யப்பட வாய்ப்பு உண்டு, அதனால் ரீபண்ட் குறையும்.
படிவம் 16 என்பது பணியாளர்களுக்கு சம்பள மற்றும் TDS விவரங்களை தரும் முக்கியமான சான்றிதழ். நிறுவனங்கள் இந்த சான்றிதழை ஜூன் 15க்குள் வழங்க வேண்டிய கட்டாயத்தில் உள்ளன. தாமதமானால் தினசரி ₹500 அபராதம் விதிக்கப்படும்.
மேலும், கடந்த நிதியாண்டின் கடைசி காலாண்டுக்கான TDS விவரங்கள் மற்றும் வங்கி வட்டிவிதிப்புகள் இன்னும் முழுமையாக வருமான வரி கணக்கில் சேர்க்கப்படவில்லை. இவை ஜூன் 2ம் வாரம் வந்துவிடும்.
இதனால் வருமானம் மற்றும் கழிவுகளை முழுமையாக கணக்கிட்டு, அதிக வரி ரீபண்ட் பெற ஜூன் 15க்குப் பிறகு தான் தாக்கல் செய்வது நல்லது. தவறான தகவல்களால் ரீபண்ட் வாய்ப்பு குறையாதவாறு பாதுகாத்துக்கொள்ள இது முக்கியமான அறிவுறுத்தலாகும்.
