சென்னையில் தலைமையிடமாக உள்ள முருகப்பா குழுமத்தின் துணை நிறுவனமான டியூப் இன்வெஸ்ட்மென்ட்ஸ், 170 கோடி ரூபாய் முதலீட்டில் தொழில் விரிவாக்க நடவடிக்கைகளை மேற்கொள்ள, அதன் இயக்குனர்கள் குழுவின் ஒப்புதலினை பெற்றுள்ளது. இந்நிறுவனம் வாகனங்களுக்கு தேவையான உதிரி பாகங்களை தயாரிக்கும் தொழிலில் செயல்பட்டு வருகிறது.
இந்த முதலீட்டின் கீழ், ‘பைன் பிளாங்கிங்’ எனப்படும் உலோகம் சார்ந்த உதிரி பாகங்கள் தயாரிப்பதற்கான புதிய ஆலையை மேற்கு இந்தியாவில் அமைக்கவும், தென்னிந்தியாவில் ஏற்கனவே உள்ள தொழிற்சாலையை விரிவாக்கம் செய்யவும் திட்டமிட்டுள்ளது. அடுத்த ஆண்டுக்குள் இந்த பணிகளை முடிக்க முனைந்துள்ள இந்த நிறுவனம், அதன் விரிவாக்க திட்டங்களுக்கான பணிகளுக்கு இயக்குனர்களின் குழு ஒப்புதல் அளித்துள்ளது.
சமீபத்தில், டியூப் இன்வெஸ்ட்மென்ட்ஸ் தன் மூன்றாம் காலாண்டு முடிவுகளை வெளியிட்டு, 161 கோடி ரூபாய் நிகர லாபத்தை ஈட்டியுள்ளதாக அறிவித்துள்ளது. அதோடு, பங்குதாரர்களுக்கு இடைக்கால டிவிடெண்ட் தொகையாக பங்கு ஒன்றுக்கு இரண்டு ரூபாயை வழங்குவதாக இந்த நிறுவனம் தெரிவித்துள்ளது.
