நிதி ஒழுக்கம் என்பது வாழ்வின் முக்கிய அடிப்படைகளில் ஒன்றாகக் கருதப்படுகிறது. மாதாந்திர சம்பளத்தில் ஒரு பகுதியை ஒதுக்கி, திட்டமிட்ட முறையில் சேமிப்பது அவசர காலங்களிலும் எதிர்கால இலக்குகளையும் அடைய உதவுகிறது. இந்த பண்பை வளர்க்கும் ஒரு பயனுள்ள சேமிப்பு வாய்ப்பு தான் ரெக்கரிங் டெபாசிட் (RD). இது வங்கிகள் மற்றும் நிதி நிறுவனங்கள் வழங்கும் ஒரு நீண்டகால முதலீட்டு திட்டமாகும்.
ரெக்கரிங் டெபாசிட் மூலமாக, வாடிக்கையாளர்கள் ஒவ்வொரு மாதமும் 500 அல்லது 1000 போன்ற ஒரு நிர்ணயிக்கப்பட்ட தொகையை செலுத்தி, ஒரு குறிப்பிட்ட காலத்துக்குள் தொகையை சேமிக்கலாம். இந்த கால அவகாசம் குறைந்தது 6 மாதம் முதல் 10 ஆண்டுகள் வரை இருக்கலாம். அக்கவுண்ட் ஆரம்பிக்கும் போதே வட்டி விகிதம் நிர்ணயிக்கப்படுகிறது, மற்றும் சந்தை நிலை என்னவாக இருந்தாலும் அது மாறாது. முக்கியமாக, இது பங்குசந்தை தாக்கத்தை எதிர்கொள்ளாது என்பதனால், ரிஸ்க் இல்லாத, பாதுகாப்பான சேமிப்பு தேர்வாக இது உள்ளது.
மூன்று மாதங்களுக்கு ஒருமுறை கூட்டு வட்டியில் கணக்கிடப்படும் இந்த திட்டம், உங்கள் முதலீட்டின் மீது கூடுதல் வட்டியையும் தருகிறது. தேவையின் பேரில், RD கணக்கின் அடிப்படையில் கடன் பெறுவதற்கும் வாய்ப்பு உண்டு. ஆனால் மெச்சூரிட்டிக்கு முன்பே கணக்கை மூட வேண்டுமானால், வட்டி குறைவது அல்லது அபராதம் செலுத்த வேண்டிய நிலை ஏற்படலாம். ஆனாலும், ஆன்லைன் மூலமாக RD கணக்கு ஆரம்பிப்பது மிகவும் எளிமையானது – உங்கள் வங்கி செயலியில் நுழைந்து, தேவையான தொகையும் கால அவகாசமும் தேர்வு செய்தால் போதும்.
இத்தகைய திட்டம் தனிநபர் நிதி ஒழுக்கத்தையும், நம்பிக்கையுடனான சேமிப்பை வளர்க்கும் பண்பையும் ஊக்குவிக்கிறது. உங்கள் மாத வருமானத்தில் இருந்து சிறிய தொகையை ஒதுக்கி, தவறாமல் RD திட்டத்தில் செலுத்துவது, காலப்போக்கில் ஒரு முக்கிய நிதி ஆதாரமாக மாறும். பணம் பாதுகாப்பாக இருக்க வேண்டும், மேலும் வளர்ந்தாக வேண்டும் என நினைப்பவர்கள் இந்த சேமிப்புத் திட்டத்தை இன்று தொடங்குவது நல்ல தொடக்கமாக இருக்கும்.
