ஒரு சவரன் தங்கத்தின் விலை தற்போது ரூ.75,000 ஐ நெருங்கி வருகிறது. இந்த நிலைமையே நடுத்தர வர்க்கத்தினருக்கு பெரும் சுமையாக அமைந்துள்ளது. ஆனால் இது விலை உயர்வின் ஆரம்பமே என சர்வதேச முதலீட்டு நிறுவனங்கள் எச்சரிக்கின்றன. குறிப்பாக, “Gold We Trust Report 2025” என்ற புதிய அறிக்கையில், 2030 ஆம் ஆண்டுக்குள் ஒரு அவுன்ஸ் (31.1 கிராம்) தங்கத்தின் விலை 8,900 அமெரிக்க டாலருக்கு உயரும் என கணிக்கப்பட்டுள்ளது. இந்திய மதிப்பெண்ணின் அடிப்படையில், ஒரு டாலர் ரூ.83 என வைத்தால், அந்த ஆண்டில் ஒரு கிராம் தங்கத்தின் விலை ரூ.23,751 ஆகும். இதற்காக, ஒரு சவரன் தங்கத்தின் விலை ரூ.1.80 லட்சம் வரை செல்வதற்கான வாய்ப்பு உள்ளது.
இந்த தகவல் முதலீட்டு துறையில் பெரும் அதிர்வலை ஏற்படுத்தியுள்ளது. கடந்த சில ஆண்டுகளில் பல நாடுகளின் மத்திய வங்கிகள் தங்களின் தங்க கையிருப்புகளை அதிகரித்து வருகின்றன. இந்த வளர்ச்சி, தங்கத்தின் எதிர்கால விலை மேலும் உயரும் என்பதற்கான முக்கிய அடையாளமாக பார்க்கப்படுகிறது. ரஷ்யாவின் மத்திய வங்கி தங்களது நிதிக் கையிருப்பில் உள்ள தங்கத்தின் சதவிகிதத்தை கடந்த 10 ஆண்டுகளில் 8% இலிருந்து 34% ஆக உயர்த்தியுள்ளது. அதேபோல், சீனா மாதத்திற்கு 40 மெட்ரிக் டன் தங்கத்தை வாங்கும் எனவும், கோல்ட்மேன் சாக்ஸ் நிறுவனம் தெரிவித்துள்ளது.
இந்நிலையில், 2025 இறுதிக்கே ஒரு அவுன்ஸ் தங்கத்தின் விலை 4,080 டாலரைத் தொடும் என கணிக்கப்பட்டுள்ளது. இது இந்திய மதிப்பில் ஒரு கிராம் ஆபரணத் தங்கத்திற்கான விலையை ரூ.10,895 ஆக உயர்த்தும். இதுவே வருங்காலத்தில் தங்கத்தின் விலை 19% வருடாந்து வளர்ச்சியுடன் செல்வதை உறுதி செய்கிறது.
சந்தையில் கிடைக்கும் மற்ற முதலீட்டு வாய்ப்புகள் – நிலையான வைப்புத் திட்டங்கள், பரஸ்பர நிதிகள், பங்குச் சந்தை முதலியன – 10-12% வருமானத்தை மட்டுமே தருகின்றன. ஆனால் தங்கத்தில் 19% வளர்ச்சி எனும் கணிப்பு, இது ஒரு நீண்டகால முதலீட்டு விருப்பமாகும் என்பதை வலியுறுத்துகிறது.
தங்கத்தின் விலை அதிகரிப்பதற்கான மற்றொரு காரணமாக, உலகின் மத்திய வங்கிகள் தொடர்ந்து தங்கத்தை அதிக அளவில் கையிருப்பில் வைக்க முயற்சிப்பது கூறப்படுகிறது. சந்தை நிபுணர்கள் இதனை எச்சரிக்கையாக பார்த்து வருகின்றனர். தங்கத்தின் விலை சமீப காலமாகவே 75% உயர்ந்துள்ளதாகவும், இந்தப் போக்கு தொடர்ந்து தொடரும் வாய்ப்பு அதிகமுள்ளதாகவும் அவர்கள் தெரிவித்துள்ளனர்.
இந்த எண்ணிக்கைகள் பொதுமக்கள் மற்றும் நகைப்பிரியர்களிடையே கலக்கம் ஏற்படுத்தும் வகையில் உள்ளன. தங்கம் இனி முதலீட்டாக மட்டுமின்றி, பாதுகாப்பான சேமிப்பு வடிவமாகவும் பார்க்கப்படும் சூழல் உருவாகி வருகிறது.
எனவே, வரும் ஆண்டுகளில் தங்கத்தின் விலை எந்த அளவுக்கு சென்று சேரும் என்பது வாடிக்கையாளர்களும் முதலீட்டாளர்களும் கண்காணிக்க வேண்டிய முக்கிய விஷயமாக மாறியுள்ளது.
