ஆன்லைன் உணவு டெலிவரி நிறுவனமான சொமேட்டோ தனது பெயரை மாற்றியுள்ளது. இனி அது ‘எட்டர்னல்’ (Eternal) என்ற புதிய பெயரில் செயல்படும். இந்த மாற்றத்திற்கான அதிகாரப்பூர்வ அறிவிப்பை நிறுவனத்தின் நிறுவனர் தீபிந்திர் கோயல் வெளியிட்டுள்ளார்.
குருகிராமில் செயல்படும் இந்த நிறுவனம், பிளிங்கிட்டை வாங்கியபோது Eternal என்ற பெயரை உள்தளத்தில் பயன்படுத்த தொடங்கியது. நிறுவனத்தின் எதிர்கால வளர்ச்சிப் பணி இந்த புதிய பெயருக்கு அமைவாக இருக்கும் என நிர்வாகக் குழு தெரிவித்துள்ளது. ஆனால், இதனால் பிராண்டில் எதுவும் மாற்றம் செய்யப்படவில்லை என்றும், செயலியிலும் எந்த மாற்றமும் இருக்காது என்றும் நிறுவனம் விளக்கமளித்துள்ளது.
இந்த புதிய மாற்றத்தால், உணவு டெலிவரி செய்யும் சொமேட்டோ, குயிக் காமர்ஸ் துறையில் செயல்படும் பிளிங்கிட், நிகழ்வுகள் சார்ந்த டிஸ்ட்ரிக்ட்ஸ், சமையலறைப் பொருட்கள் விநியோகிக்கும் ஹைப்பர்ப்யூர் ஆகிய நான்கு பிராண்டுகளும் இனி ‘எட்டர்னல் லிமிடெட்’ என்ற பெயரில் செயல்படும். கடந்த 2022-ல் பிளிங்கிட் வாங்கப்பட்டதோடு, அதன் மேலாண்மை Eternal லிமிடெட்டின் கட்டுப்பாட்டிற்குள் வந்துள்ளது.
தற்போது, இந்தியாவில் பெரும்பாலான மக்கள் உணவு ஆர்டர் செய்ய ஆன்லைன் பயன்பாட்டு செயலிகளை அதிகம் பயன்படுத்தி வருகின்றனர். பசித்த நேரத்தில் விரைவாக உணவை பெற்றுக் கொள்ள இந்த டிஜிட்டல் நுகர்வு கலாச்சாரம் பெரிதும் பரவி வருகிறது. சொமேட்டோ இந்தத் துறையில் முக்கியமான இடத்தை பிடித்த நிறுவனம் ஆகும். 2008-ல் Foodie-Bay என்ற பெயரில் தொடங்கிய இந்நிறுவனம், 2015-ல் உணவு டெலிவரி சேவையை இந்தியாவில் அறிமுகப்படுத்தியது.
இந்த மாற்றத்துடன், Zomatoவின் பங்கு சந்தை மதிப்பும் எதிர்கால வளர்ச்சி நோக்குகளும் எப்படி அமையும் என்பதில் பங்குதாரர்களும் வணிக வல்லுநர்களும் கவனம் செலுத்தி வருகின்றனர்.
