லாகூரில் உள்ள கடாபி மைதானத்தில் இன்று பிற்பகல் 2.30 மணிக்கு நடைபெற இருக்கும் சாம்பியன்ஸ் டிராபி கிரிக்கெட் லீக் ஆட்டத்தில் ஆஸ்திரேலியா மற்றும் ஆப்கானிஸ்தான் அணிகள் மோதவிருக்கின்றன. அரை இறுதிக்கு முன்னேற இந்த ஆட்டம் இரு அணிகளுக்கும் மிக முக்கியமானதாக உள்ளது.
இங்கிலாந்து அணியை 5 விக்கெட்கள் வித்தியாசத்தில் வீழ்த்தி முதல் வெற்றியை பெற்ற ஆஸ்திரேலியா, தென் ஆப்பிரிக்காவுடன் விளையாட இருந்த இரண்டாவது ஆட்டம் மழை காரணமாக ரத்து செய்யப்பட்டது. இதனால் தற்போது 3 புள்ளிகளுடன் ‘பி’ பிரிவில் இரண்டாவது இடத்தில் உள்ளது. அரை இறுதி சுற்றுக்கு முன்னேற இன்று வெற்றி பெற வேண்டிய கட்டாயத்தில் அந்த அணி உள்ளது.
முகப்பில் தோல்வி அடைந்த ஆப்கானிஸ்தான், இங்கிலாந்து அணியை 8 ரன்கள் வித்தியாசத்தில் வீழ்த்தி சாம்பியன்ஸ் டிராபி தொடரில் அசத்தியது. தற்போது 2 புள்ளிகளுடன் இருக்கும் அந்த அணி, இன்று ஆஸ்திரேலியாவை வீழ்த்தினால் அரை இறுதிக்கு முன்னேறுவதற்கான வாய்ப்பை உறுதி செய்யும்.
இங்கிலாந்து அணிக்கு எதிராக நடந்த போட்டியில் 37 ரன்களுக்கு 3 விக்கெட்களை இழந்த நிலையில் இப்ராகிம் ஸத்ரன் 177 ரன்கள் விளாசி அதிர்ச்சியை ஏற்படுத்தினார். அவருடன் இணைந்து விளையாடிய அஸ்மதுல்லா ஓமர்ஸாய் பேட்டிங்கில் ஆதரவு அளித்ததோடு, பந்து வீச்சில் 5 விக்கெட்களை வீழ்த்தி அணியின் வெற்றியில் முக்கிய பங்கு வகித்தார். இந்த ஆட்டத்திலேயே இங்கிலாந்து அணி வெளியேறியது.
கடந்த ஆண்டு நடந்த டி20 உலகக் கோப்பையில் ஆப்கானிஸ்தான் அணி அரை இறுதிக்கு முன்னேறியது. இம்முறை சாம்பியன்ஸ் டிராபி தொடரிலும் அதே வெற்றி தொடருவதை நோக்கமாகக் கொண்டு விளையாடுகிறது. இப்ராகிம் ஸத்ரன், ஹஸ்மதுல்லா ஷாகிதி, அஸ்மதுல்லா ஓமர்ஸாய் ஆகியோரிடம் இருந்து ஆட்டநேரத்தில் சிறப்பான செயல்பாடு எதிர்பார்க்கப்படுகிறது.
ஆஸ்திரேலியா 15 ஆண்டுகளுக்குப் பின்னர் சாம்பியன்ஸ் டிராபி கோப்பையை வெல்லும் முயற்சியில் உள்ளது. 2006 மற்றும் 2009-ஆம் ஆண்டுகளில் வெற்றி கண்ட அந்த அணி, 2013 மற்றும் 2017-ஆம் ஆண்டுகளில் இறுதி சுற்றுக்கு முன்னேறத் தவறியது.
ஆஸ்திரேலிய அணியின் முக்கிய வேகப்பந்து வீச்சாளர்கள் மிட்செல் ஸ்டார்க், பாட் கம்மின்ஸ், ஜோஷ் ஹேசில்வுட் ஆகியோர் காயம் காரணமாக அணியில் இல்லாததால், அனுபவமற்ற பந்து வீச்சாளர்களின் செயல்பாடு அணியின் வெற்றிக்கு முக்கியமானதாக இருக்கும். இங்கிலாந்து அணிக்கு எதிராக 351 ரன்களை கொடுத்தபோதும், ஆஸ்திரேலியா வெற்றி பெற்றது. அந்த ஆட்டத்தில் 86 பந்துகளில் 120 ரன்கள் விளாசிய ஜோஷ் இங்லிஷ் இன்று மீண்டும் அதே ஆட்டத்தை வெளிப்படுத்தலாம்.
மேத்யூ ஷார்ட், அலெக்ஸ் கேரி, மார்னஷ் லபுஷேன் ஆகியோர் பேட்டிங்கில் நம்பகத்தன்மையை வழங்குவார்கள் என்று எதிர்பார்க்கப்படுகிறது. தொடக்க ஆட்டக்காரர்களான டிராவிஸ் ஹெட், கேப்டன் ஸ்டீவ் ஸ்மித் ஆகியோர் கடந்த போட்டியில் குறைந்த ரன்களில் வெளியேறியதால், அவர்கள் பொறுப்புடன் விளையாட வேண்டிய நிலை உள்ளது.
பின்வரிசையில் கிளென் மேக்ஸ்வெல் தாக்குதல் ஆட்டம் மேற்கொள்வார் என்று கருதப்படுகிறது. கடந்த டி20 உலகக் கோப்பையில் ஆப்கானிஸ்தான் அணியை எதிர்த்து ஆஸ்திரேலியா தோல்வி கண்டது. இதனால் இன்று ஆப்கானிஸ்தான் அணியை குறைத்து மதிப்பிடாது ஆஸ்திரேலியா கவனமாக விளையாடும்.
மேக்ஸ்வெல்லுக்கு திட்டமா என்ற கேள்விக்கு ஆப்கானிஸ்தான் அணியின் கேப்டன் அஸ்மதுல்லா ஷாகிதி, “நாங்கள் ஆஸ்திரேலிய அணிக்கே திட்டமிட்டுள்ளோம். ஒரே ஒரு வீரருக்கு மட்டும் திட்டமிடவில்லை. மேக்ஸ்வெல்லின் கடந்த சாதனைகள் பற்றி எங்களுக்கு தெரியும். ஆனால் ஒட்டுமொத்த அணியையே கவனத்தில் கொண்டு விளையாடுவோம்” எனத் தெரிவித்தார்.
2023-ஆம் ஆண்டு உலகக் கோப்பையில் ஆப்கானிஸ்தான் அணிக்கு எதிராக ஆஸ்திரேலிய அணி 91 ரன்களுக்கு 7 விக்கெட்களை இழந்த பின்னரும், கிளென் மேக்ஸ்வெல் தனிப்பட்ட முறையில் 201 ரன்கள் விளாசி அணிக்கு வெற்றி தேடிக்கொடுத்தார். இதனால் இன்று நடக்கும் ஆட்டத்தில் அவரை முக்கியமாக கவனிக்க ஆப்கானிஸ்தான் அணி திட்டமிடக்கூடும்.
