அமெரிக்காவின் முன்னாள் அதிபர் பராக் ஓபாமா, தற்போதைய அதிபர் டிரம்ப் கொண்டு வந்துள்ள புதிய வரி மற்றும் மருத்துவ நிதி குறைப்புச் சீர்திருத்த மசோதாவுக்கு கடுமையான எதிர்ப்பைத் தெரிவித்துள்ளார். அவர் மக்களுக்கு அழைப்பு விடுத்ததாவது, இந்த மசோதா வெறும் அரசியல் தீர்மானமாக இல்லாமல், ஒவ்வொரு பொது குடிமகனின் வாழ்க்கையையும் நேரடியாக பாதிக்கக்கூடியதாக இருக்கும் என்பதையே உணர்த்துவதாகும்.
பிக் பியூட்டிபுல் என்ற பெயரில் வரிக்குறைப்பு மசோதா அமெரிக்க செனட்டில் கடந்த வாரம் ஒப்புதல் பெற்றது. இதனுடன், மெடிக் எய்ட் எனப்படும் மருத்துவ நிதி உதவியை குறைக்கும் மசோதாவும் ஒன்றாக பரிசீலிக்கப்படுகிறது. இந்த நடவடிக்கைகள் பணக்கார வர்க்கத்துக்கு நன்மையளிக்கும் வகையில் இருப்பதாகவும், சாதாரண மக்களின் நலன்களை புறக்கணிக்கின்றன என்றும் பலர் தெரிவிக்கின்றனர். தொழிலதிபர் எலான் மஸ்க் உட்பட பலர் இந்த மசோதாவுக்கு தங்களது எதிர்ப்பை வெளிப்படுத்தியுள்ள நிலையில், பராக் ஒபாமாவின் கருத்தும் பெரும் தாக்கத்தை ஏற்படுத்தியுள்ளது.
ஒபாமா தனது சமூகவலைதளப் பதிவில், “இந்த மசோதா உங்கள் செலவுகளை அதிகரிக்கும், மக்களுக்கான சுகாதார நிதி குறைவாகும், பணம் இழக்கும் குடும்பங்கள் அதிகரிக்கும். இதற்காக இன்று உங்கள் உள்ளாட்சி பிரதிநிதியிடம் தொடர்பு கொண்டு, இந்த மசோதாவை எதிர்த்து ஓட்டளிக்க வலியுறுத்துங்கள்” என தெரிவித்துள்ளார். இந்த அறிக்கைக்கு டிரம்ப் தரப்பில் மறுமொழி வரவில்லை என்றாலும், நாடு முழுவதும் உள்ள ஜனநாயக விரும்பிகள் இந்த மசோதாவை எதிர்க்கும் நடவடிக்கையில் ஈடுபட்டு வருகின்றனர்.
டிரம்ப் நிர்வாகத்தின் இந்த வருவாய் மற்றும் நிதிச்சீர்திருத்த முயற்சிகள், வர்த்தக வளர்ச்சிக்கான உரிய முயற்சி என சிலர் பாராட்டுகின்ற நிலையில், மற்றொரு தரப்பில் மக்கள் நலன்களை புறக்கணிக்கும் அரசியல் நடவடிக்கையென கடுமையாக விமர்சிக்கப்படுகிறது. இந்நிலையில், எதிர்வரும் நாட்களில் இந்த மசோதா மீதான வாக்கெடுப்பு நடைபெறவுள்ள நிலையில், அதற்கான பாதிப்புகள் பல வட்டங்களில் விவாதிக்கப்படும் என எதிர்பார்க்கப்படுகிறது.
