வாஷிங்டன்: நீண்டகாலமாக நீடித்துக் கொண்டிருந்த இஸ்ரேல்-ஹமாஸ் போர் நிறுத்தம் குறித்த எதிர்பார்ப்பு இன்று நனவாகியுள்ளது. அமெரிக்க அதிபர் டொனால்ட் டிரம்ப் அறிவித்ததன்படி, இரு தரப்பினரும் அமைதித் திட்டத்தின் முதல் கட்டத்தில் கையெழுத்திட்டுள்ளனர். இதன் மூலம் பல மாதங்களாக போரில் சிக்கிய பிணைக்கைதிகள் விரைவில் விடுவிக்கப்படுவார்கள் எனவும் அவர் தெரிவித்தார்.
எகிப்தில் நடைபெற்ற பலமணி நேர பேச்சுவார்த்தையின் பின் எட்டப்பட்ட இந்த ஒப்பந்தம் மத்திய கிழக்கில் பெரும் நிம்மதியை ஏற்படுத்தியுள்ளது. “அமைதியை உருவாக்கும் பணியில் கத்தார், துருக்கி, எகிப்து ஆகிய நாடுகள் முக்கிய பங்கு வகித்துள்ளன” என டிரம்ப் பாராட்டியுள்ளார். மேலும், இஸ்ரேல் தனது பாதுகாப்பு படையினரை படிப்படியாக திரும்பப் பெறும் என்றும் அறிவிக்கப்பட்டுள்ளது.
வெள்ளை மாளிகையில் நிருபர்களின் கேள்விகளுக்கு பதிலளித்த டிரம்ப், “அமைதிக்கான நோபல் பரிசு எனக்குக் கிடைக்குமா என தெரியாது, ஆனால் ஏழு போர்களை முடிவுக்கு கொண்டுவந்துள்ளோம். எட்டாவது ஒப்பந்தமும் அருகில் உள்ளது” என்று கூறினார். அதேசமயம், சில நாடுகளில் இருந்து அமைதி முயற்சிகள் குறித்து நல்ல முன்னேற்றம் ஏற்பட்டுள்ளதாகவும் அவர் குறிப்பிட்டார்.
இந்நிலையில், இஸ்ரேல் பிரதமர் நெதன்யாகு, “கடவுளின் அருளால் எங்கள் பிணைக்கைதிகளை வீட்டிற்கு திரும்பக் கொண்டு வருவோம்” எனக் கூறி தனது நம்பிக்கையை வெளிப்படுத்தியுள்ளார். இதனால் உலக நாடுகளின் கவனம் மீண்டும் மத்திய கிழக்கில் நிலைநிறுத்தப்பட்ட அமைதி முயற்சிகளின் மீது திரும்பியுள்ளது.
