ஜெருசலேம்: ஹமாஸ் அடுத்து விடுவிக்கப்பட உள்ள 11 பிணைக்கைதிகளின் பெயர் பட்டியலை வெளியிட்டுள்ளது. இவர்களில் 8 பேர் இன்று (ஜன.,30) விடுவிக்கப்பட உள்ளனர்.
மேற்காசிய நாடான இஸ்ரேல் மற்றும் காசா பகுதியை கட்டுப்பாட்டில் வைத்துள்ள ஹமாஸ் பயங்கரவாதிகள் இடையே 2023, அக்டோபர் 7 ஆம் தேதி போர் துவங்கியது. அமெரிக்கா, கத்தார், எகிப்து ஆகியவற்றின் மத்தியஸ்த முயற்சியால், சமீபத்தில் போரை நிறுத்துவதற்கான ஒப்பந்தம் கையெழுத்தானது. இந்த ஒப்பந்தத்தின் பேரில், ஹமாஸ் பிடித்துச் சென்று பிணைக்கைதிகளை விடுவிக்கவும், அதேபோல் இஸ்ரேல் சிறையில் உள்ள பாலஸ்தீனர்களையும் விடுவிக்க முடிவு செய்யப்பட்டது. இதுவரை, 7 பிணைக்கைதிகளை ஹமாஸ் விடுவித்துள்ளது.
இந்நிலையில், அடுத்து விடுவிக்கப்பட உள்ள பிணைக்கைதிகள் 11 பேரின் பெயர் பட்டியலை ஹமாஸ் வெளியிட்டுள்ளது. இவர்கள் விரைவில் விடுவிக்கப்பட உள்ளனர். இவர்களில் 8 பேர் இன்று (ஜன.,30) விடுவிக்கப்பட உள்ளனர். இஸ்ரேல் அதிகாரிகள் கூறியதாவது, இந்த வாரம் இரண்டு நாட்களில் காசாவில் அடைத்து வைக்கப்பட்டுள்ள 5 பேர் என தாய்லாந்து நாட்டை சேர்ந்த பிணைக்கைதிகள் உட்பட மொத்தம் 11 பேர் விடுவிக்கப்படுவார்கள்.
ஹமாஸ் இதுவரை ஏழு பணயக்கைதிகளை விடுவித்துள்ளது. அதற்குப் பதிலாக, இஸ்ரேலில் இருந்து 290 பேர் விடுவிக்கப்பட்டனர். ஹமாஸ் சிறையிலிருந்து இன்று விடுவிக்கப்பட வேண்டிய பிணைக்கைதிகளின் பட்டியலை எங்களிடம் அனுப்பி வைக்கப்பட்டது. அதன்படி, மூன்று இஸ்ரேலியர்கள் மற்றும் ஐந்து தாய்லாந்து நாட்டினர் மொத்தம் 8 பேர் இன்று விடுவிக்கப்பட உள்ளனர்.
காசாவில் 19 ஆம் தேதி போர் நிறுத்தம் நடைமுறைக்கு வந்ததும், போரினால் பாதிக்கப்பட்ட பாலஸ்தீனப் பகுதிக்குள் ஏராளமான உதவிப் பொருட்கள் அனுமதிக்கப்பட்டு உள்ளன.
