டெஹ்ரான்: இஸ்ரேலுடன் தொடர்ந்து நடைபெற்று வரும் போர் சூழ்நிலையில், இருபுறத்திலும் சிக்கல் அதிகரித்து வருகிறது. தற்போது, போர் நிறுத்தம் தொடர்பான பேச்சுவார்த்தைகளை ஈரான் எதிர்த்து வருகின்றது. இஸ்ரேல் கடந்த சில நாட்களாக ஈரானில் உள்ள அணுசக்தி மையங்கள் மற்றும் ராணுவ கட்டிடங்களை தீவிரமாக தாக்கி வருகிறது.
ஒரே இரவில் மட்டும் 80 இடங்களை குறிவைத்து தாக்குதல் நடத்தப்பட்டுள்ளது. இதில் ஈரானின் முக்கிய அணுசக்தி விஞ்ஞானர்கள் மற்றும் ராணுவ அதிகாரிகள் உயிரிழந்ததாக தகவல் வெளியாகியுள்ளது. இதையடுத்து, ஈரானின் முக்கிய தலைவர் அயதுல்லா அலி காமேனிக்கு எதிராக இஸ்ரேல் திட்டமிட்டிருப்பதாக கூறப்படுகிறது. இந்த தகவலுக்கு அமெரிக்க அதிபர் டிரம்ப் கடும் எதிர்ப்பு தெரிவித்துள்ளதாக கூறப்படுகிறது.
இதுவரை ஈரானில் 230 பேர் உயிரிழந்துள்ளனர் என அந்த நாட்டு அரசு தெரிவித்துள்ளது. இதில் 90 சதவீதம் பொதுமக்கள் எனவும் கூறப்பட்டுள்ளது. இஸ்ரேலிலும் குழந்தைகள் உட்பட 10 பேர் கொல்லப்பட்டுள்ளதாக தகவல் வெளியாகியுள்ளது. இந்த தாக்குதல்கள் மத்திய கிழக்கு பகுதியில் பதற்றத்தை அதிகரித்துள்ளன.
அமெரிக்கா, கத்தார் மற்றும் ஓமான் ஆகிய நாடுகள், இரு தரப்பினரையும் பேச்சுவார்த்தைக்குக் கொண்டு வர முயற்சி செய்து வருகின்றன. இருப்பினும், ஈரான் “இஸ்ரேலின் தாக்குதல்களுக்கு முழுமையான பதிலடி அளித்த பிறகே பேச்சுவார்த்தை குறித்து யோசிப்போம்” என தெரிவித்துள்ளது. இந்த நிலை நீடித்தால், கச்சா எண்ணெய் விலைகள் உயரும் அபாயம் உள்ளது.
