உலகம் முழுவதும் உள்ள கத்தோலிக்க கிறிஸ்தவர்களின் தலைவராக இருக்கும் போப் ஆண்டவர் என அழைக்கப்படும் போப் பிரான்சிஸ், 88, ஐரோப்பிய நாடான இத்தாலியின் ரோம் நகரில் உள்ள வாடிகன் நகரில் வசித்து வருகிறார். வயது மூப்பு காரணமாக அவர் உடல்நலக் குறைவு காரணமாக அடிக்கடி சிகிச்சை பெற்றுவருகிறார்.
கடந்த பிப்ரவரி 14ம் தேதி, அவரது உடல்நிலை திடீரென மோசமடைந்ததால், ரோம் நகரில் உள்ள ஜெமிலி மருத்துவமனையில் அவசரமாக சேர்க்கப்பட்டார். பரிசோதனைக்குப் பின், அவருக்கு நிமோனியா இருப்பது கண்டறியப்பட்டது. இதனால் மூச்சு விடுவதில் அவர் கடும் சிரமத்தை எதிர்கொண்டார்.
மருத்துவர்கள், அவருக்கு செயற்கை சுவாசம் அளித்து, பாக்டீரியா மற்றும் வைரஸ் எதிர்ப்பு மருந்துகளை வழங்கி தீவிர சிகிச்சை அளித்தனர். 38 நாட்கள் மருத்துவமனையில் இருந்த அவர், உடல்நலம் தேறியதால் நேற்று டிஸ்சார்ஜ் செய்யப்பட்டார்.
இந்த தகவல் அறிந்து, நூற்றுக்கணக்கான கத்தோலிக்கர்கள் மற்றும் பொதுமக்கள் போப்பை பார்க்க மருத்துவமனை முன் திரண்டனர். சக்கர நாற்காலியில் மருத்துவமனையை விட்டு வெளியே வந்த போப், கூட்டத்தினரை பார்த்து கை அசைத்துவிட்டு, வாடிகனில் உள்ள தனது இல்லத்துக்கு புறப்பட்டார்.
மருத்துவர்கள், “போப் பிரான்சிஸ் உடல்நலம் சீராக இருந்தாலும், அவருக்கு முழுமையான ஓய்வு அவசியம். அடுத்த இரண்டு மாதங்கள் அவர் பார்வையாளர்களை சந்திக்கக்கூடாது” என்று அறிவித்தனர்.
இந்த சம்பவம் கத்தோலிக்கர்களிடையே பெரும் மகிழ்ச்சியை ஏற்படுத்தியது. அவரது வெளியேற்றத்திற்குப் பின், சமூக ஊடகங்களில் உலகம் முழுவதும் கத்தோலிக்கர்கள் அவருக்கு வாழ்த்துக்களை தெரிவித்தனர்.
போப் பிரான்சிஸ், 2013ஆம் ஆண்டு முதல் கத்தோலிக்க திருச்சபையின் தலைவராக இருக்கிறார். தனது எளிமையான வாழ்வியல் முறையும், சமூக நீதி சார்ந்த செயல்பாடுகளாலும் புகழ்பெற்றவர்.
நிமோனியாவிலிருந்து அவர் மீண்டுள்ள செய்தி, வாடிகன் மற்றும் கத்தோலிக்க உலகில் பெரும் உற்சாகத்தை ஏற்படுத்தியுள்ளது. அவர் விரைவில் முழுமையாக குணமடைந்து தனது வழக்கமான பணிகளில் ஈடுபடுவார் என அனைவரும் எதிர்பார்க்கின்றனர்.
