பாகிஸ்தானிலிருந்து வரும் அனைத்து வகையான அஞ்சல்கள் மற்றும் பார்சல்களையும் விமானம் மற்றும் தரை வழியாக பரிமாற்றம் செய்வதை இந்தியா முற்றாக நிறுத்தியுள்ளது. பஹல்காமில் ஏப்ரலில் நிகழ்ந்த பயங்கரவாதத் தாக்குதலுக்குப் பிறகு இருநாடுகளுக்கிடையேயான உறவுகள் கடுமையாக பாதிக்கப்பட்டுள்ள நிலையில், இந்த நடவடிக்கை எடுக்கப்பட்டுள்ளது. இந்திய தொலைத்தொடர்பு அமைச்சகம் இதைத்த் திங்களன்று அதிகாரப்பூர்வமாக அறிவித்தது.
இந்த நடவடிக்கையின் நோக்கம் தேசிய பாதுகாப்பை உறுதி செய்வதோடு, எல்லை தாண்டி நடக்கும் ஊடுருவல்களை கட்டுப்படுத்துவதே எனத் தெரிவிக்கப்பட்டுள்ளது. பாகிஸ்தானிலிருந்து வரக்கூடிய அனைத்து பொருட்கள் — அது அஞ்சலாக இருந்தாலும், வர்த்தகப் பொருட்களாக இருந்தாலும் — எந்தவொரு வடிவிலும் இந்தியா அதை ஏற்க மாட்டாது என்ற உறுதியுடன் இந்த முடிவு எடுக்கப்பட்டுள்ளது.
இந்தத் தடை அஞ்சல் சேவைகள் மட்டுமல்லாமல், வர்த்தக நடவடிக்கைகளையும் உள்படுத்துகிறது. பாகிஸ்தானில் தயாரிக்கப்படும் அல்லது அங்கிருந்து ஏற்றுமதி செய்யப்படும் பொருட்கள் இந்தியா இறக்குமதி செய்யவேண்டிய அவசியமில்லை என்றும், வர்த்தக அமைச்சகம் 2023 வெளியிட்டிருந்த வெளிநாட்டு வர்த்தகக் கொள்கையில் (FTP) திருத்தம் செய்து அதைத் தடை செய்துள்ளது. இந்த விதிமுறைகள் அடுத்த அறிவிப்பு வரும் வரை தொடரும் எனவும், மே 2ஆம் தேதி வெளியிடப்பட்ட அறிவிப்பில் குறிப்பிடப்பட்டுள்ளது.
இத்தகைய கடுமையான முடிவுகள், பாகிஸ்தான் மீது இந்தியா எடுத்துவரும் தொடர்ச்சியான தடைகளை மேலும் வலுப்படுத்துகின்றன. ஏற்கனவே பாகிஸ்தான் கொடியுடன் வருகிற அனைத்து வணிகக் கப்பல்களும் இந்திய துறைமுகங்களில் நுழைய தடை விதிக்கப்பட்டுள்ளது. தற்போது அஞ்சல் சேவைகளும் நிறுத்தப்பட்டுள்ளதால், இருநாடுகளுக்கும் இடையிலான தொடர்பு மிகக் கடுமையாக பாதிக்கப்பட்டுள்ளது.
இந்த தடை, பஹல்காமில் நிகழ்ந்த பயங்கரவாதத் தாக்குதலுக்கு பதிலடியாக இந்தியா எடுத்த மிக முக்கியமான நடவடிக்கையாக பார்க்கப்படுகிறது. அந்த தாக்குதலில் 26 பேர் கொல்லப்பட்டதைத் தொடர்ந்து, பாகிஸ்தான் மண்ணில் இருந்து செயல்படும் பயங்கரவாதக் குழுக்களே இதற்கு காரணமாக இருந்ததாக உளவுத்துறையின் அறிக்கைகள் தெரிவிக்கின்றன.
லஷ்கர்-இ-தொய்பா மற்றும் ஜெய்ஷ்-இ-முகமது போன்ற குழுக்கள் பாகிஸ்தானின் ஆதரவுடன் செயல்படுவதாக இந்தியா தொடர்ந்து குற்றச்சாட்டுகளை முன்வைத்துவருகிறது. பாகிஸ்தான் எந்தவித நடவடிக்கையும் எடுக்காமல் அமைதியாக இருப்பதை இந்தியா கடுமையாக கண்டித்து, அனைத்து நிலைகளிலும் தொடர்பை துண்டிக்கத் தயாராகி விட்டது.
இந்த நிலையில், அடுத்த கட்ட நடவடிக்கைகள் என்னவாகும் என்பது தற்போதைக்கு தெரியவில்லை. ஆனால் இந்தியாவின் தற்போதைய நோக்கம் மிகவும் தெளிவானது — பாகிஸ்தான் உறுதியான நடவடிக்கைகளை எடுக்கும் வரை, எந்தவொரு தொடர்பும் இருக்காது. வர்த்தகம், கடல்சார் போக்குவரத்து, அஞ்சல் சேவைகள் அனைத்தும் நிறுத்தப்பட்டுள்ளதால், இருநாடுகளுக்கும் இடையில் பரஸ்பர நம்பிக்கை என்பது இல்லாத நிலை ஏற்பட்டுள்ளது.
இது இருநாடுகளுக்கிடையே ஏற்பட்டுள்ள மோசமான உறவுகளின் வெளிப்படையான அடையாளமாகவும், பாகிஸ்தானுக்கு இந்தியா விடுக்கும் ஒரு கடும் அரசியல் செய்தியாகவும் பார்க்கப்படுகிறது. தற்போது பாகிஸ்தான் நிலை மாறும் வரை வழக்கம்போல வணிகத் தொடர்பு தொடராது என்பதே இந்தியாவின் உறுதியான நிலைப்பாடாகும்.
