இஸ்ரேல் மற்றும் ஹமாஸ் இடையேயான மோதல் மீண்டும் தீவிரமடைந்துள்ளது. சமீபத்தில் காஸா பகுதியில் ஏற்பட்ட தாக்குதல்கள், எட்டு நாட்களாக நிலவிய அமைதி ஒப்பந்தத்தை முற்றிலும் மீறி விட்டன. தெற்கு காஸாவின் ராஃபா நகரில் இஸ்ரேல் தொடர்ந்து வான்வழித் தாக்குதல்களை மேற்கொண்டு வருகிறது. இது ஹமாஸ் வீரர்கள் தங்கள் படையினருக்கு எதிராக நடத்திய துப்பாக்கிச் சூட்டுக்கு பதிலடி என இஸ்ரேல் ராணுவம் விளக்கம் அளித்துள்ளது.
இரண்டு ஆண்டுகளுக்கும் மேலாக நீடித்து வரும் இஸ்ரேல் – ஹமாஸ் மோதலில் 60 ஆயிரத்துக்கும் மேற்பட்ட பாலஸ்தீனர்கள் உயிரிழந்துள்ளதாக தகவல்கள் தெரிவிக்கின்றன. சர்வதேச சமூகங்களின் அழுத்தத்திற்கிடையில், அமெரிக்காவின் நடுநிலை முயற்சியால் கடந்த வாரம் தற்காலிக போர் நிறுத்த ஒப்பந்தம் அமலுக்கு வந்தது. ஆனால், நிலைமை தற்போது மீண்டும் பதற்றமடைந்துள்ளது. இதன் காரணமாக காஸா பகுதி முழுவதும் மீண்டும் போரின் பயம் நிலவுகிறது.
இந்நிலையில், இஸ்ரேல் அதிபர் பென்ஜமின் நெதன்யாகு செய்தியாளர்களிடம் தெரிவித்ததாவது, “ஹமாஸ் படையினர் ஆயுதத்தை முழுமையாக கைவிடும் வரை எங்களின் ராணுவ நடவடிக்கைகள் நிறுத்தப்படமாட்டாது. எங்கள் நாட்டின் பாதுகாப்பு எங்களின் முதல் கடமை” என கூறினார். மேலும், ஹமாஸ் தொடர்ந்து தாக்குதல்களை மேற்கொள்வதால், எங்கள் ராணுவம் அதற்கு தகுந்த பதிலடி அளிப்பது தவிர்க்க முடியாதது எனவும் அவர் குறிப்பிட்டார்.
நிபுணர்கள் கூறுவதாவது, இஸ்ரேல் தற்போது ராணுவ மற்றும் அரசியல் ரீதியிலும் தன்னுடைய நிலைப்பாட்டை உறுதிப்படுத்த முயல்கிறது. அதே சமயம், காஸா பகுதியில் நடைபெறும் வான்வழித் தாக்குதல்கள் அப்பகுதி பொதுமக்களுக்கு கடுமையான பாதிப்பை ஏற்படுத்தி வருகின்றன. சர்வதேச அமைப்புகள் இரு தரப்பும் அமைதி பேச்சுவார்த்தைக்கு திரும்ப வேண்டும் என வலியுறுத்தி வருகின்றன. ஆனால் தற்போதைய சூழலில், ஹமாஸ் ஆயுதம் கைவிடும்வரை இந்த மோதல் முடிவடைய வாய்ப்பு இல்லை என அரசியல் வட்டாரங்கள் கூறுகின்றன.
