மாஸ்கோ: உக்ரைன் நடத்திய பெரிய அளவிலான டிரோன் தாக்குதலுக்குப் பின்னர், அமெரிக்காவின் அதிபர் டொனால்ட் ட்ரம்ப் மற்றும் ரஷ்ய அதிபர் விளாடிமிர் புடின் இடையே நேற்று ஒரு மணி நேரத்துக்கும் மேலாக அவசரமாக போன் உரையாடல் நடந்தது. ட்ரம்ப் தனது ட்ரூத் சோஷியல் பக்கத்தில் இந்த தகவலை உறுதிப்படுத்தியதோடு, ரஷ்ய போர் விமான தளங்கள் மீது மேற்கொள்ளப்பட்ட தாக்குதல்களைப் பற்றி விரிவாக விவாதித்ததாக கூறினார்.
உக்ரைன் நடத்திய திட்டமிட்ட தாக்குதலில் ரஷ்யாவின் 41 போர் விமானங்கள் அழிக்கப்பட்டுள்ளன. இதில் ரஷ்யாவின் Tu-95 மற்றும் Tu-22 போர் விமானங்கள் சேதமடைந்தது, இது ரஷ்யா-உக்ரைன் போரில் மிகப்பெரிய இழப்பாகக் கருதப்படுகிறது. “ஆபரேஷன் ஸ்பைடர் வெப்” என்ற பெயரில் நடத்திய இந்த தாக்குதலால் ரஷ்ய விமானப்படைக்கு கடுமையான பாதிப்பு ஏற்பட்டுள்ளது.
மர்மன்ஸ்க், இர்குட்ஸ்க், இவானோவோ, ரியாசான், அமுர் ஆகிய விமான தளங்கள் குறிவைத்து சிறிய ரக சூசைட் டிரோன்கள் அனுப்பப்பட்டன. இவை ரேடாரில் தெரியாமல் தாழ்வாக பறந்து நேராக விமானங்களின் மீது விழுந்து வெடித்துள்ளன. குறிப்பாக ஹேங்கரில் இருந்த விமானங்கள் நேரடியாக தாக்கப்பட்டதாக ரஷ்ய பாதுகாப்பு அமைச்சகம் தெரிவித்துள்ளது.
தற்போதைய நிலைமை ரஷ்யாவை கடுமையான பதிலடி திட்டங்களை வகுக்கத் தூண்டியுள்ளது. ட்ரம்ப் கூறியதுபோல், புடின் இந்த தாக்குதலுக்கு வலுவான பதில் தர விரும்புகிறார். ஆனால் இது உடனடியாக அமைதிக்கு வழிவகுக்கும் பேச்சுவார்த்தை அல்ல என்றும் ட்ரம்ப் தெரிவித்தார். இரு தலைவர்களும் போர் மற்றும் பயங்கரவாதத்தைத் தாண்டி, ஈரான் அணு ஆயுத விவகாரத்தையும் விவாதித்தனர்.
300-க்கும் மேற்பட்ட டிரோன்கள் ஒரே நேரத்தில் தாக்கியதால் ரஷ்ய விமானப்படை பாரிய அளவில் பாதிக்கப்பட்டுள்ளது. இதனால் ரஷ்யா தனது எதிர்வினையை தீவிரமாகவும், தீர்மானத்துடனும் முன்னெடுக்கலாம் என்ற அச்சம் நிலவுகிறது. இதன் காரணமாக, ரஷ்யா அடுத்த கட்ட நடவடிக்கைகளுக்குத் தயார் நிலையில் உள்ளது என கூறப்படுகிறது.
உக்ரைன்-ரஷ்யா போர் மூன்றாம் ஆண்டில் தொடர்கிறது. பிப்ரவரி 2022ல் ரஷ்யா உக்ரைனில் முழுமையான படையெடுப்பைத் தொடங்கியதிலிருந்து, பல உள்நாட்டிலும், சர்வதேச தரப்பிலும் அமைதி பேச்சுவார்த்தைகள் முயற்சிக்கப்பட்டாலும், இதுவரை எந்த ஒரு நிலையான உடன்பாடும் ஏற்பட்டதில்லை.
அமெரிக்கா தொடர்ந்து அமைதிக்கு வழி தேட முயற்சி செய்து வருகின்ற நிலையில், ட்ரம்ப் மற்றும் புடின் இடையேயான இந்த பேச்சுவார்த்தை எதிர்கால போர் நிலவரத்திற்கு முக்கியமான மைல்கல்லாக இருக்கலாம் என்ற அச்சத்தோடும், எதிர்பார்ப்போடும் உலக நாடுகள் பலவும் கவனிக்கின்றன.
