சென்னை: பொறியியல் கல்லூரிகளில், ஒரே நேரத்தில் 10க்கும் மேற்பட்ட கல்லூரிகளில் பணிபுரியும் 189 பேராசிரியர்கள் ஏமாற்றியது கண்டுபிடிக்கப்பட்டுள்ளது.
அண்ணா பல்கலைக்கழகத்தின் இணைப்பின் கீழ் 450க்கும் மேற்பட்ட பொறியியல் மற்றும் ‘ஆர்கிடெக்ட்’ கல்லூரிகள் இயங்கி வருகின்றன. இவற்றில் 433 கல்லூரிகள் இந்த ஆண்டு பொறியியல் கவுன்சிலிங்கில் பங்கேற்க உள்ளன. இக்கல்லூரிகள் அண்ணா பல்கலைக்கழகத்தின் இணைப்பு அந்தஸ்தைப் பெற்றிருக்க வேண்டும் மற்றும் அகில இந்திய தொழில்நுட்பக் கல்வி கவுன்சிலால் அங்கீகரிக்கப்பட்டிருக்க வேண்டும்.
அங்கீகாரம் பெற, அவர்கள் ஒவ்வொரு ஆண்டும் தங்கள் கல்வி நிறுவன விவரங்களை சமர்ப்பிக்க வேண்டும். அதில், கட்டிட உறுதித்தன்மை, பாதுகாப்பு, சுகாதாரம் போன்றவற்றுக்கு சான்றிதழ் வழங்க வேண்டும்.
மேலும், கல்லூரி வகுப்பறைகள், ஆய்வகங்கள், கழிப்பறைகள், குடிநீர், கல்வி நிறுவனத்தில் பணிபுரியும் ஆசிரியர்கள், பணியாளர்கள் உள்ளிட்ட அடிப்படை வசதிகளை தாக்கல் செய்ய வேண்டும். இந்த ஆவணங்களின் நம்பகத்தன்மை குறித்து, அண்ணா பல்கலைக்கழக குழு நேரடியாக கல்லூரிகளை ஆய்வு செய்வது வழக்கம்.
இந்நிலையில், நேற்று ‘அறப்போர் இயக்கம்’ சார்பில், தமிழக லஞ்ச ஒழிப்புத் துறையில் புகார் மனு அளிக்கப்பட்டது. அதில், பொறியியல் கல்லூரி பேராசிரியர்கள் 353 பேர் போலி ஆவணங்களை சமர்ப்பித்து 10க்கும் மேற்பட்ட கல்லூரிகளில் பணிபுரிவதாக குறிப்பிடப்பட்டிருந்தது. இந்த புகார் குறித்து அண்ணா பல்கலைக்கழக துணைவேந்தர் வேல்ராஜ் தலைமையிலான குழு விசாரணை நடத்தியது.
இதுகுறித்து, துணைவேந்தர் அளித்த பேட்டி:
அறப்போர் இயக்கம் அளித்த புகாரின்படி, பேராசிரியர்களின் ஆதார் எண், பெயர், பிறந்த தேதி விவரங்களை ஆய்வு செய்தோம். இதில், ஆதார் எண் அடிப்படையில், எந்த முரண்பாடும் தெரியவில்லை. ஆனால் 2000 ஆசிரியர்கள் பற்றாக்குறை இருப்பது தெரியவந்தது. அப்போது, எங்களது தரவுகளில் உள்ள பேராசிரியர்களின் பிறந்த தேதி, பெயர், ஆதார் எண் ஆகியவற்றைப் பொருத்தியதில் 189 பேர் ஒரே நேரத்தில் பல கல்லூரிகளில் பணிபுரிவது போல் ஆதார் எண்ணை மாற்றி பதிவு செய்தது தெரியவந்தது.
மொத்தம் உள்ள 52,500 பேராசிரியர்களில் 2000 ஆசிரியர் பணியிடங்களில் 189 பேர் உள்ளனர். அவர்களில் ஒருவர் 32 கல்லூரிகளில் பணிபுரிவது கண்டறியப்பட்டது. இது மிகப்பெரிய மோசடி. இதில் தொடர்புடையவர்கள் மீதும், போலி ஆவணங்கள் மூலம் பேராசிரியர்களின் விவரங்களை சமர்ப்பித்த கல்லூரிகள் மீதும் சட்டப்படி நடவடிக்கை எடுக்கப்பட உள்ளது. இது குறித்து விசாரிக்க குழு அமைக்கப்பட்டுள்ளது. இவ்வாறு அவர் கூறினார்.
