மயிலாடுதுறையில் நடைபெற்ற நிகழ்ச்சியில் தமிழக முதல்வர் மு.க.ஸ்டாலின் பொதுமக்கள் சேவை திட்டங்களை தொடங்கி வைத்தார். ரூ.48.17 கோடி மதிப்பிலான 47 வேலைகளைத் திறந்துவைத்து, ரூ.113.51 கோடி மதிப்பிலான 12 புதிய திட்டங்களுக்கு அடிக்கல் நாட்டினார். இந்த நிகழ்வில் பேசிய அவர், ‘உங்களுடன் ஸ்டாலின்’ திட்டத்தை பற்றி விளக்கினார். மக்களின் கோரிக்கைகளை அதிவேகமாக தீர்க்கும் நோக்கத்தில் இந்த திட்டம் உருவாக்கப்பட்டுள்ளது. ரேஷன் கார்டு, ஆதார் கார்டு உள்ளிட்ட பணிகள் அதே நாளில் முடிக்கப்படும் என கூறினார். இந்த திட்டத்தினால் மக்களுக்கு நேரடி பயன் கிடைக்கும் என்றார்.
இதற்கிடையில், எதிர்க்கட்சித் தலைவர் எடப்பாடி பழனிசாமி இந்த திட்டத்தைக் கடுமையாக விமர்சித்து வருகின்றார். அவர், “திமுக நடத்தும் நாடகம்” என திட்டத்தை கிண்டல் செய்துள்ளார். இதற்கு பதிலளித்த ஸ்டாலின், “விமர்சனம் என்ற பெயரில் திட்டத்திற்கே விளம்பரம் செய்கிறார் எடப்பாடி. அதற்காக அவருக்கு நன்றி சொல்கிறேன்” என பேசினார். திட்டத்தை பார்த்து பயப்படுகிறார் என்பதற்காகவே தொடர்ந்து விமர்சிக்கிறார் என்றும் தெரிவித்தார்.
மீண்டும் அவர் எடப்பாடியின் சுற்றுப்பயணத்தையும் விமர்சித்தார். “சுந்தரா டிராவல்ஸ் திரைப்படத்தில் வருவது போல் பஸ்ஸை எடுத்துக்கொண்டு கிளம்பி விட்டார். அந்த பஸ்ஸிலிருந்து புகை வருவது போல், அவருடைய வாயிலிருந்து பொய்கள், அவதூறு வந்து கொண்டிருக்கிறது” என கூறினார். எடப்பாடி பழனிசாமி ஒருவரே திட்டத்தின் முழு விவரத்தையும் சொல்லிவிட்டார் என்றும் தெரிவித்தார். நிகழ்ச்சி முழுவதும் மக்கள் ஆர்வமாகக் கலந்து கொண்டனர்.
