ஜேம்ஸ் கேமரூன் இயக்கிய ‘அவதார்’ மிகப்பெரிய வெற்றிப் படம். அதன் தொடர்ச்சியாக, உலகளவில் அதிக வசூல் செய்த படமான ‘அவதார்: தி வே ஆஃப் வாட்டர்’ 2022-ல் உலகம் முழுவதும் 160 மொழிகளில் வெளியிடப்பட்டு வெற்றி பெற்றது. இதன் மூன்றாம் பகுதிக்கு ‘அவதார்: ஃபயர் அண்ட் ஆஷ்’ என்று பெயரிடப்பட்டுள்ளது.
சாம் வொர்திங்டன், ஜோ சல்டானா, சிகோனி வீவர், ஸ்டீபன் லங் மற்றும் பலர் இதில் நடித்துள்ளனர். “இந்தப் படத்தில் நீங்கள் எப்போதையும் விட அதிகமான பண்டோராவைப் பார்ப்பீர்கள்; சாகசங்களைக் கொண்ட இந்தப் படம் கண்களுக்கு விருந்தாக இருக்கும். முன்பை விட அதிக உணர்ச்சிகரமான காட்சிகளும் இருக்கும்” என்று ஜேம்ஸ் கேமரூன் ஏற்கனவே கூறியிருந்தார்.
இந்நிலையில், இதன் முதல் டிரெய்லர் வெளியாகி கவனத்தை ஈர்த்துள்ளது. இரண்டு நிமிடங்கள் 25 வினாடிகள் நீளமுள்ள இந்த டிரெய்லர், பண்டோராவில் நடக்கும் முழுமையான போர்க் காட்சியைக் கொடுக்கிறது.
நிலம், கடல் மற்றும் வானத்தில் நடக்கும் போர் காட்சிகளின் காட்சிகள், படத்திற்கான உற்சாகத்தைத் தூண்டுகின்றன. இந்தக் கதை அவர்களின் சமூகத்தை ஆபத்திலிருந்து பாதுகாப்பதில் உள்ள சவால்களை ஆராய்கிறது. இந்தப் படம் டிசம்பர் 19-ம் தேதி உலகம் முழுவதும் வெளியாக உள்ளது.
