சென்னை: அதர்வா நடிப்பில் வெளியான ‘இதயம் முரளி’ திரைப்படத்தின் ஓடிடி வெளியீட்டு தேதி அறிவிக்கப்பட்டுள்ளது. அதன்படி, திரைப்படம் வரும் ஆகஸ்ட் 7-ம் தேதி நெட்ஃபிளிக்ஸ் தளத்தில் வெளியாக உள்ளது.
ஆகாஷ் பாஸ்கரன் இயக்கத்தில் உருவான இப்படத்தில் அதர்வாவுடன் ப்ரீத்தி முகுந்தன், கயாடு லோஹர், நட்டி உள்ளிட்ட பலர் நடித்துள்ளனர். இசையமைப்பாளர் தமன் இப்படத்திற்கு இசையமைத்ததுடன், முக்கிய கதாபாத்திரத்திலும் நடித்துள்ளார். மேலும் பிரபல மலையாள நடிகர் ஃபகத் ஃபாசில் சிறப்புத் தோற்றத்தில் நடித்துள்ளார்.
ஒருதலைக் காதலை மையமாகக் கொண்டு உருவான இப்படம் திரையரங்குகளில் வெளியானபோது ரசிகர்களிடம் ஓரளவு வரவேற்பைப் பெற்றது. இதையடுத்து சென்னையில் படக்குழுவினர் பங்கேற்ற வெற்றி விழாவும் நடைபெற்றது.
படத்தின் பாடல்கள் ரசிகர்களிடையே கவனம் பெற்ற நிலையில், ‘வாமா வாமா’ வீடியோ பாடல் தனுஷின் பிறந்தநாளை முன்னிட்டு ஜூலை 22-ம் தேதி வெளியிடப்பட்டது. தொடர்ந்து அந்தப் பாடலின் ஏர்போர்ட் வெர்ஷன் மற்றும் ‘இதயா எக்ஸ்டெண்டெட் வெர்ஷன்’ உள்ளிட்டவை வெளியாகின.
இந்த நிலையில், படத்தின் ஓடிடி வெளியீடு குறித்த அதிகாரப்பூர்வ அறிவிப்பு வெளியாகியுள்ளது. நெட்ஃபிளிக்ஸ் தளத்தில் ஆகஸ்ட் 7 முதல் ‘இதயம் முரளி’ திரைப்படத்தை தமிழ் மட்டுமின்றி இந்தி, தெலுங்கு, கன்னடம் மற்றும் மலையாள மொழிகளிலும் ரசிகர்கள் காணலாம் என தெரிவிக்கப்பட்டுள்ளது.
