புதுடெல்லி: ‘‘பெண்களுக்கு எதிரான குற்றங்களை தடுக்க மோடி அரசு கடந்த 10 ஆண்டுகளில் உறுதியான எதையும் செய்யவில்லை’’ என காங்கிரஸ் தலைவர் மல்லிகார்ஜுன கார்கே குற்றம்சாட்டியுள்ளார்.
“மகள்களைப் பாதுகாப்போம் என்று சுவர்களில் ஓவியம் வரைவதால் சமூக மாற்றம் வருகிறதா அல்லது சட்டம் ஒழுங்கை அரசு திறமையாக நிர்வகிக்கிறதா?” கேள்விகளை அடுக்கியுள்ளார்.
மேற்கு வங்க மாநிலம் கொல்கத்தாவில் உள்ள அரசு மருத்துவக் கல்லூரி மருத்துவமனையில் பயிற்சி மருத்துவர் பாலியல் வன்கொடுமைக்கு ஆளாகி கொல்லப்பட்ட சம்பவம் நாடு முழுவதும் பெரும் அதிர்ச்சியை ஏற்படுத்தியுள்ளது.
இதுகுறித்து மல்லிகார்ஜுன் கார்கே வெளியிட்டுள்ள எக்ஸ் பதிவில், “எங்கள் பெண்களுக்கு இழைக்கப்படும் அநீதி பொறுத்துக்கொள்ள முடியாதது, வேதனையானது, கடும் கண்டனத்துக்குரியது.
மத்திய அரசின் ‘மகள்களைக் காக்க’ என்ற பிரசாரம் எங்களுக்குத் தேவையில்லை. மாறாக, ‘சமமான நிலையை உறுதி செய்ய வேண்டும். பெண்களுக்கான உரிமைகள், அச்சமற்ற சூழல். நாட்டில் ஒரு மணி நேரத்திற்கு 43 பெண்களுக்கு எதிரான குற்றங்கள் பதிவு செய்யப்படுகின்றன.
நம் நாட்டில் மிகவும் பாதிக்கப்படக்கூடிய தலித் – பழங்குடி சமூகத்தைச் சேர்ந்த பெண்கள் மற்றும் குழந்தைகளுக்கு எதிராக ஒவ்வொரு நாளும் 22 குற்றங்கள் பதிவு செய்யப்படுகின்றன.
அச்சம், மிரட்டல், சமூகக் காரணங்களால் பல குற்றங்கள் பதிவாகாமல் இருக்கின்றன. பிரதமர் மோடி செங்கோட்டையில் ஆற்றிய உரைகளில் பெண்களின் பாதுகாப்பு குறித்து பலமுறை பேசியுள்ளார்.
ஆனால், கடந்த 10 ஆண்டுகளில் பெண்களுக்கு எதிரான குற்றங்களைத் தடுக்க அவரது அரசு உறுதியான எதையும் செய்யவில்லை. மாறாக, பாதிக்கப்பட்டவர்களின் நடத்தையை கேள்விக்குள்ளாக்கும் வெட்கக்கேடான செயலை அவரது கட்சி மீண்டும் மீண்டும் செய்துள்ளது.
ஒவ்வொரு சுவரிலும் ‘மகளை காப்போம்’ என்று ஓவியம் வரைவதால் சமூக மாற்றம் வருமா அல்லது சட்டம் ஒழுங்கை அரசு திறம்பட கையாண்டால் வருமா? தடுப்பு நடவடிக்கைகளை எடுக்கலாமா? நமது குற்றவியல் நீதி அமைப்பு மேம்பட்டுள்ளதா?
சமூகத்தில் சுரண்டப்பட்ட மற்றும் தாழ்த்தப்பட்ட பிரிவினர் இப்போது பாதுகாப்பான சூழலில் வாழ முடியுமா? இதுபோன்ற சம்பவங்களை அரசும் நிர்வாகமும் மூடி மறைக்க முயலவில்லையா?
உண்மை வெளிவராமல் இருக்க இறந்தவர்களின் இறுதி ஊர்வலத்தை காவல்துறை வற்புறுத்தி நிறுத்தியதா? பணியிடத்தில் பெண்களுக்கு ஏற்படும் பாலியல் துன்புறுத்தல் (தடுப்பு, தடை மற்றும் நிவர்த்தி) சட்டம், 2013 இன் விதிகள் முறையாக செயல்படுத்தப்பட்டு, பணியிடத்தில் நம் பெண்களுக்கு அச்சமில்லாத சூழலை உருவாக்க முடியுமா?
அரசியலமைப்புச் சட்டம் பெண்களுக்கு சம அந்தஸ்தை வழங்கியுள்ளது. பெண்களுக்கு எதிரான குற்றங்கள் ஒரு தீவிரமான பிரச்சினை. இந்த குற்றங்களை தடுப்பது நாட்டுக்கு பெரும் சவாலாக உள்ளது.
இதற்குத் தீர்வு காண நாம் அனைவரும் ஒன்றிணைந்து சமூகத்தின் ஒவ்வொரு பிரிவினருடன் இணைந்து பணியாற்ற வேண்டும்.
பாலின விழிப்புணர்வு பாடத்திட்டம், பாலின பட்ஜெட், பெண்கள் உதவி மையங்கள், நகரங்களில் தெருவிளக்குகள், பெண்களுக்கான கழிவறைகள், காவல்துறை சீர்திருத்தங்கள், நீதித்துறை சீர்திருத்தங்கள் என பெண்களின் உரிமைகளை உறுதி செய்வதற்கான அனைத்து நடவடிக்கைகளையும் எடுக்க வேண்டிய நேரம் வந்துவிட்டது.
இவற்றின் மூலம், அச்சமில்லாத சூழலை உறுதி செய்ய முடியும்” என்று கார்கே கூறினார்.
