புதுடெல்லி: டெல்லியில் நடந்த இயற்கை எரிவாயு தொழில்நுட்ப கண்காட்சியில் பேசிய நிதின் கட்கரி, “வளர்ந்த இந்தியாவின் கனவை நனவாக்க பல்வேறு முயற்சிகள் தேவை.
தற்போது ஆண்டுக்கு ரூ.22 லட்சம் கோடி மதிப்பிலான கச்சா எண்ணெய்யை இறக்குமதி செய்கிறோம். இது உண்மையில் காற்று மாசு பிரச்சினை மட்டுமல்ல. ஆனால் ஒரு பொருளாதார பிரச்சினை.
கச்சா எண்ணெய் இறக்குமதியை குறைக்க நாம் உயிரி எரிபொருளை ஊக்குவிக்க வேண்டும். எத்தனால் ஒரு உயிரி எரிபொருள். எனவே, பெட்ரோல் அல்லது டீசல், எத்தனால் மற்றும் மின்சாரத்தில் இயங்கக்கூடிய ஃப்ளெக்ஸ் எரிபொருள் வாகனங்களுக்கான வரியை குறைக்க மாநில அரசுகள் முன்வர வேண்டும்.
டாடா, சுஸுகி மற்றும் டொயோட்டா ஆகிய நிறுவனங்கள் ஃப்ளெக்ஸ் ஃப்யூல் இன்ஜின்கள் கொண்ட வாகனங்களைத் தயாரிக்கத் தொடங்கியுள்ளன. பஜாஜ் மற்றும் டிவிஎஸ் நிறுவனங்களும் 100% எத்தனாலில் இயங்கும் மாடல்களை தயாரித்துள்ளன.
இத்தகைய ஃப்ளெக்ஸ் எரிபொருள் இயந்திரங்களைக் கொண்ட வாகனங்களுக்கு ஜிஎஸ்டி வரி 12% ஆகும். இதை குறைக்க மாநில அரசுகள் முன்வர வேண்டும்.
உத்தரபிரதேச முதல்வர் யோகி ஆதித்யநாத் கலந்து கொண்ட நிகழ்ச்சியில் பேசும் போது இந்த கோரிக்கையை முன்வைத்தேன். அவர் அதை ஏற்றுக்கொண்டார். அதை உதாரணமாக எடுத்துக்கொண்டு மற்ற மாநிலங்களும் ஃப்ளெக்ஸ் எரிபொருள் வாகனங்கள் மீதான வரியை குறைக்க வேண்டும்.
எத்தனாலை எரிபொருளாக பயன்படுத்துவதன் மூலம் கச்சா எண்ணெய் இறக்குமதியை குறைக்க முடியும். எத்தனாலை எரிபொருளாகப் பயன்படுத்துவதன் மூலம் விவசாயத் துறை பெரிதும் பயனடையலாம்.
நமது மொத்த உள்நாட்டு உற்பத்தியில் விவசாயம் தற்போது 12% பங்களிக்கிறது. உற்பத்தித் துறை 22-24%. சேவை பிரிவு 52-54%. மொத்த உள்நாட்டு உற்பத்தியில் 12% பங்களிக்கும் விவசாயத் துறை, அதன் மனித வளத்தில் 65% க்கும் அதிகமானவற்றைப் பயன்படுத்துகிறது.
பிரதமர் மோடி வலியுறுத்தி வரும் தன்னம்பிக்கை இந்தியாவை உருவாக்க நமது பொருளாதாரம் 5 டிரில்லியன் டாலர் பொருளாதாரமாக உருவாக வேண்டும். அப்போதுதான் 3-வது பெரிய பொருளாதாரமாக மாற வேண்டும் என்ற பொதுவான இலக்கை அடைய முடியும்.
இதற்கு இறக்குமதியை குறைத்து ஏற்றுமதியை அதிகரிக்க வேண்டும். நமது இறக்குமதிச் செலவைக் குறைப்பதில் இயற்கை எரிபொருள் துறை மிக முக்கியப் பங்காற்ற முடியும்.
மேலும், கிராமப்புற மற்றும் பழங்குடியின மக்களின் பொருளாதாரத்தை மேம்படுத்த முடியும்,” என்றார்.
