வடகிழக்கு பருவமழை தொடக்கத்திலேயே தீவிரம்: ஒரு நாள் மழைக்கே மிதக்கும் சென்னை

சென்னை: வங்கக்கடலில் நிலைகொண்டிருந்த ஆழ்ந்த காற்றழுத்த தாழ்வு மண்டலம் இன்று வலுப்பெற்று காற்றழுத்த தாழ்வு மண்டலமாக மாறும். இதன் காரணமாக தமிழகம், புதுச்சேரி, காரைக்கால் ஆகிய 22 மாவட்டங்களில் கனமழை பெய்யும் என வானிலை ஆய்வு மையம் தெரிவித்துள்ளது.

சென்னை, திருவள்ளூர், காஞ்சிபுரம், செங்கல்பட்டு ஆகிய 4 மாவட்டங்களில் கனமழைக்கு ‘ரெட் அலர்ட்’ விடுக்கப்பட்டுள்ளது. இதுகுறித்து இந்திய வானிலை ஆய்வு மைய தென் மண்டல தலைவர் எஸ்.பாலச்சந்திரன் சென்னையில் நேற்று நிருபர்களிடம் கூறியதாவது:-

தென்மேற்கு பருவமழை கடந்த 15-ம் தேதி (நேற்று) குறைந்துள்ள நிலையில், தமிழகத்தில் வடகிழக்கு பருவமழை தொடங்கி தீவிரமடைந்துள்ளது. தென்கிழக்கு வங்கக்கடலில் குறைந்த காற்றழுத்த தாழ்வு பகுதி வலுப்பெற்று தெற்கு வங்கக்கடலின் மத்திய பகுதியில் நிலை கொண்டுள்ளது.

இது மேற்கு-வடமேற்கு திசையில் நகர்ந்து தென்மேற்கு வங்கக்கடலில் இன்று (16-ம் தேதி) குறைந்த காற்றழுத்த தாழ்வு பகுதியாக வலுப்பெறும். இது அடுத்த 24 மணி நேரத்தில் வட தமிழகம், புதுச்சேரி மற்றும் அதை ஒட்டிய தெற்கு ஆந்திர கடலோரப் பகுதிகளை நோக்கி நகரக்கூடும்.

தெற்கு ஆந்திரப் பிரதேசம் மற்றும் அதை ஒட்டிய மத்திய மேற்கு வங்கத்தின் கடலோரப் பகுதிகளில் வளிமண்டல மேலடுக்கு சுழற்சி நிலவுகிறது. இதன் காரணமாக இன்றும் நாளையும் (அக் 16, 17) வட தமிழகத்தில் பெரும்பாலான இடங்களிலும், தென்கிழக்கில் ஒரு சில இடங்களிலும் இடி, மின்னலுடன் லேசானது முதல் மிதமானது வரை மழை பெய்யக்கூடும்.

18-ம் தேதி முதல் 21-ம் தேதி வரை ஒரு சில இடங்களில் லேசானது முதல் மிதமானது வரை மழை பெய்ய வாய்ப்புள்ளது. இன்று (அக்.16) சென்னை, திருவள்ளூர், செங்கல்பட்டு மற்றும் காஞ்சிபுரம் மாவட்டங்களில் கனமழை முதல் மிக கனமழை மற்றும் ஒரு சில இடங்களில் கனமழை பெய்யும்.

வேலூர், ராணிப்பேட்டை, திருவண்ணாமலை, கள்ளக்குறிச்சி, பெரம்பலூர், அரியலூர், மயிலாடுதுறை, தஞ்சாவூர், திருவாரூர், நாகப்பட்டினம், கடலூர், விழுப்புரம் மாவட்டங்கள், புதுச்சேரி, காரைக்கால், கிருஷ்ணகிரி, திருப்பத்தூர், திருச்சி, சேலம், தருமபுரி, சேலம் ஆகிய மாவட்டங்களில் ஓரிரு இடங்களில் கனமழை முதல் மிக கனமழை பெய்யும்.

இந்நிலையில், நேற்று பெய்த கனமழையால் சென்னை மாநகரின் பல்வேறு சாலைகளில் தண்ணீர் தேங்கியது. வாகனங்கள் நீண்ட வரிசையில் நின்றதால், பல்வேறு பகுதிகளில் கடும் போக்குவரத்து நெரிசல் ஏற்பட்டது.

பள்ளிக்கரணை, கண்ணகி நகர், துரை பாக்கம், வேளச்சேரி, மடிப்பாக்கம், ராம்நகர், பெருங்குடி, பெரும்பாக்கம், முடிச்சூர் வரதராஜபுரம் உள்ளிட்ட பகுதிகளில் வெள்ளம் பெருக்கெடுத்து ஓடுவதால், மக்கள் வெளியே வர முடியாமல் தவிக்கின்றனர்.

தலைநகர் சென்னை ஒரு நாள் மழைக்கு தாக்குப்பிடிக்க முடியாமல் மிதக்க ஆரம்பித்துள்ளது. சென்னை பட்டாளம், புளியந்தோப்பு உள்ளிட்ட பகுதிகளுக்கு செயல்தலைவர் ஸ்டாலின் நேற்று நேரில் சென்று ஆய்வு செய்தார்.