கோவை: கோவை அரசு மருத்துவமனையில் ஜப்பான் சர்வதேச கூட்டுறவு முகமையின் (ஜைகா) ஆதரவுடன் ரூ.13 கோடி மதிப்பிலான அதிநவீன எம்ஆர்ஐ ஸ்கேன் கருவியை சுகாதாரத் துறை அமைச்சர் மா.சுப்பிரமணியன் நேற்று திறந்து வைத்தார். பின்னர், அவர் நிருபர்களிடம் கூறியதாவது:-
தமிழகத்தில் 708 இடங்களில் நகர்ப்புற சுகாதார நிலையங்கள் திறக்கப்படும் என முதல்வர் அறிவித்தார். இதில், 500 இடங்களில் மையங்கள் திறக்கப்பட்டுள்ளன. இந்த நகர்ப்புற சுகாதார நிலையங்களில் ஒரு மருத்துவர், ஒரு செவிலியர், ஒரு சுகாதார ஆய்வாளர், ஒரு உதவியாளர் ஆகிய 4 பணியிடங்களுக்கு ஒப்பந்த அடிப்படையில் ஆட்சியர் தலைமையிலான மாவட்ட சுகாதார சங்கம் மூலம் தேர்வு செய்யப்பட்டுள்ளது. இந்த மையம் காலை 8 மணி முதல் மதியம் 12 மணி வரையிலும், மாலை 4 மணி முதல் இரவு 8 மணி வரையிலும் செயல்பட வேண்டும்.
கோவை மாநகராட்சி பகுதியில் 4 இடங்களில் சோதனை செய்தபோது, 2 சுகாதார நிலையங்களில் மருத்துவர் வருகை தருவதாகவும், ஒன்றில் அனுமதி பெற்று மருத்துவர் விடுப்பில் இருப்பதாகவும் தெரிவித்தனர். இதுகுறித்து விசாரிக்க மாநகராட்சி கமிஷனருக்கு உத்தரவிடப்பட்டுள்ளது.
இந்த மையங்களில் மாலை நேரத்தில் டாக்டர்கள் பணிக்கு வருவதில்லை என புகார்கள் வந்தன. இதன் அடிப்படையில் ஆய்வுகள் மேற்கொள்ளப்பட்டு வருகின்றன. மருத்துவமனை திறக்கப்படாவிட்டாலும், பணிக்கு வரவில்லையென்றாலும், உடனடியாக பணியில் இருந்து விடுவிக்க உத்தரவிடப்பட்டுள்ளது. மீதமுள்ள 208 சுகாதார மையங்களில் 200 மையங்கள் திறக்க தயாராக உள்ளன.
கொரோனா காலத்தில் பணியாற்றிய 934 செவிலியர்கள் ஒப்பந்தப் பணியில் சேர்க்கப்பட உள்ளனர். அடுத்த வாரம் 2000 செவிலியர் பணியிடங்கள் முறைப்படுத்தப்பட்டு செவிலியர் பணியிடம் இல்லை என்ற நிலை கொண்டு வரப்படும். இவ்வாறு அவர் கூறினார்.
கோவையில் உள்ள தனியார் மருத்துவமனையில் நடந்த நிகழ்ச்சியில் பங்கேற்ற அமைச்சர் மா.சுப்பிரமணியன் பேசுகையில், புற்றுநோயை ஆரம்பத்திலேயே கண்டறிந்தால் குணப்படுத்தலாம். அதாவது 3-வது அல்லது 4-வது நிலைக்கு சென்றால் உயிருக்கு உத்தரவாதம் இல்லை. இதனையடுத்து தமிழகத்தில் புற்றுநோய் பாதிப்பை கண்டறிய தீவிர நடவடிக்கை எடுக்க முதல்வர் உத்தரவிட்டார்.
அதன்படி ஈரோடு, திருப்பத்தூர், ராணிப்பேட்டை, கன்னியாகுமரி ஆகிய 4 மாவட்டங்களில் 18 வயது பூர்த்தியடைந்த அனைவருக்கும் புற்றுநோய் பரிசோதனை நடத்தப்பட்டது. இதில் புதிதாக 109 பேர் புற்றுநோயால் பாதிக்கப்பட்டுள்ளனர். இதையடுத்து, முதல்வரின் அறிவுறுத்தலின் பேரில், தமிழகம் முழுவதும் 18 வயது நிரம்பிய அனைவருக்கும் புற்றுநோய் பரிசோதனை நடத்தப்படும்.
இதற்காக ரூ.27 கோடி நிதி ஒதுக்கீடு செய்யப்பட்டுள்ளது. ஓரிரு மாதங்களில் சோதனை நடத்தப்படும். இந்நுயிர் காப்போம்-நாஸ் பிரகா 48 திட்டத்தின் கீழ் விபத்து நடந்த 48 மணி நேரத்திற்குள் இலவச சிகிச்சை பெறுவதற்கான உச்சவரம்புத் தொகையான ரூ.1 லட்சம் போதாது என மருத்துவமனைகள் கோரிக்கை விடுத்துள்ளன.
இதையடுத்து, முதல்வர் நிதியை ரூ.2 லட்சமாக உயர்த்தி அறிவித்துள்ளார். இது தொடர்பான அரசாணை விரைவில் வெளியிடப்படும் என்றார்.
