சென்னை: நடிகர் சூர்யாவின் ‘கங்குவா’ தமிழ் சினிமாவின் நேர்த்தியான படம் என்று இயக்குநர் சுசீந்திரன், ‘பாகுபலி’யுடன் ஒப்பிட்டுப் புகழ்ந்துள்ளார். இது தொடர்பாக அவர் வெளியிட்டுள்ள காணொளியில், “நேற்று மாலை எனது குழந்தைகளுடன் ‘கங்குவா’ படத்தை பார்த்தேன். தமிழ் சினிமாவின் மிக நேர்த்தியான பிரமாண்ட படங்களில் இதுவும் ஒன்று.
தெலுங்கில் ‘பாகுபலி’ பிரமாண்டமான திரைப்படம் போல ‘கங்குவா’ படமும் அப்படித்தான் இந்தப் படத்தைப் பற்றி ஏன் தவறான தகவல்களைப் பரப்புகிறார்கள் என்று தெரியவில்லை.
ரசிக்கும்படியான திரைக்கதையை உருவாக்கிய இயக்குனர் சிவாவுக்கு எனது வாழ்த்துக்கள். சூர்யாவின் நடிப்பும் உழைப்பும் பிரமிக்க வைக்கிறது. கேமரா, சிஜி எல்லாமே உலகத்தரத்துக்கு உள்ளது. தமிழக மக்களுக்கு ஒரு வேண்டுகோள். இந்தப் படத்தைக் கொண்டாடுவதில் தாமதம் வேண்டாம். அனைவரும் குடும்பத்துடன் சென்று திரையரங்குகளில் இப்படத்தை பார்க்கின்றனர். “கங்குவா உங்களை மகிழ்விப்பான்” என தெரிவித்துள்ளார்.
