புதுடெல்லி: ராகுல் காந்தி தனது எக்ஸ் பக்கத்தில் இன்று ஒரு நீண்ட பதிவை வெளியிட்டார். சுற்றுச்சூழல் ஆர்வலர் விமலேந்து ஜாவுடன் அவர் உரையாடிய வீடியோவையும் இணைத்துள்ளார். ராகுல் தனது பதிவில், “வட இந்தியாவில் காற்று மாசுபாடு பிரச்சினை ஒரு தேசிய அவசரநிலை. நம் குழந்தைகளின் எதிர்காலத்தை திருடி முதியவர்களை திணறடிக்கும் பொது பிரச்சனை. எண்ணற்ற உயிர்களைப் பறிக்கும் சுற்றுச்சூழல் மற்றும் பொருளாதாரப் பேரழிவு.
நம்மில் உள்ள ஏழைகள் தங்களைச் சுற்றியுள்ள நச்சுக் காற்றிலிருந்து தப்பிக்க முடியாமல் மிகவும் அவதிப்படுகிறார்கள். சுத்தமான காற்று கிடைக்காமல் குடும்பங்கள் தவிக்கின்றன. குழந்தைகள் நோய்வாய்ப்படுகிறார்கள், லட்சக்கணக்கான உயிர்கள் பறிக்கப்படுகின்றன. நமது சுற்றுலா நலிவடைந்து, சர்வதேச அளவில் நமது நற்பெயருக்கு களங்கம் ஏற்படுகிறது. காற்று மாசுபாடு அதிகமாக உள்ளது.
இதை சரிசெய்ய, அரசாங்கம், நிறுவனங்கள், நிபுணர்கள் மற்றும் பொதுமக்களிடமிருந்து பெரிய மாற்றங்களும் தீர்க்கமான நடவடிக்கைகளும் தேவை. நமக்குத் தேவை கூட்டு முயற்சியே தவிர, அரசியல் பழி விளையாட்டு அல்ல. இன்னும் சில நாட்களில் பார்லிமென்ட் என்றவுடன் நம் நினைவுக்கு வருவது எரியும் கண்களும் தொண்டை வலியும் மட்டுமே.
இந்தப் பிரச்சனையை இந்தியா எப்படி முடிவுக்குக் கொண்டுவருவது என்று ஒன்று கூடி விவாதிப்பது நமது பொறுப்பு” என்று ராகுல் காந்தி கூறினார். வட இந்தியாவில் உள்ள பல நகரங்கள், குறிப்பாக டெல்லி மற்றும் அதன் சுற்றுப்புற நகரங்களான நொய்டா, காசியாபாத், குருகிராம் மற்றும் ஃப்ரிதாபாத் போன்றவை கடந்த சில வாரங்களாக கடுமையான காற்று மாசு பிரச்சனைகளை சந்தித்து வருகின்றன. டெல்லியில் நவம்பர் 16-ம் தேதி காற்றின் தரம் கடுமையாக மாறியது.
புதன்கிழமை வரை தொடர்ந்து 5 நாட்கள் கடுமையான வகையிலேயே இருந்தது. முன்னதாக, நவம்பர் 2017 மற்றும் நவம்பர் 2016-ல் தொடர்ந்து 7 நாட்களுக்கு காற்றின் தரம் மிகவும் மோசமாக இருந்தது. தற்போது, டெல்லியில் காற்றின் தரம் கடுமையான அளவை எட்டினால், ‘கிராப்’ 4 இன் கீழ் கடுமையான நடவடிக்கைகள் நகரத்தில் உள்ளன என்பது குறிப்பிடத்தக்கது.
