சென்னை: சென்னையில் இருந்து மகாபலிபுரம் வழியாக கடலூர் வரையிலான புதிய ரயில் திட்டம் போதிய நிதி ஒதுக்கப்படாததால் பல ஆண்டுகளாக முடங்கிக் கிடக்கிறது. எனவே இத்திட்டத்திற்கு கூடுதல் நிதி ஒதுக்கி விரைந்து செயல்படுத்த வேண்டும் என பயணிகள் கோரிக்கை விடுத்துள்ளனர்.
சென்னையில் இருந்து கடலோர பகுதிகள் வழியாக ரயில் பாதை அமைத்தால் போக்குவரத்து நெரிசல் குறையும். இதனால், சென்னையில் இருந்து மகாபலிபுரம், புதுச்சேரி வழியாக கடலூருக்கு 179 கி.மீ. 2007ல் ரயில்வே துறை புதிய ரயில் பாதை அமைக்க ஒப்புதல் அளித்தது.
இதற்கான முதற்கட்ட ஆய்வு பணிகளும் மேற்கொள்ளப்பட்டன. இதன் பின், பல ஆண்டுகளாக திட்டம் கிடப்பில் போடப்பட்டு, திட்ட மதிப்பீடு ரூ.1,500 கோடியை தாண்டியது. கடந்த மத்திய பட்ஜெட்டிலும் ரூ.50 கோடி மட்டுமே ஒதுக்கப்பட்டது. இதனால் பெரிய அளவில் பணிகள் நடைபெறவில்லை. எனவே இத்திட்டத்திற்கு கூடுதல் நிதி ஒதுக்கீடு செய்து விரைந்து செயல்படுத்த வேண்டும் என ரயில்வே பயணிகள் கோரிக்கை விடுத்துள்ளனர். இதுகுறித்து ரயில் பயணிகள் கூறியதாவது: சென்னையில் இருந்து புதுச்சேரி, கடலூர் வழியாக புதிய ரயில் திட்டம் செயல்படுத்தப்படும் என ரயில்வே அறிவித்து பல ஆண்டுகளாகியும் பெரிய அளவில் முன்னேற்றம் இல்லை.
தமிழகம் மற்றும் புதுச்சேரிக்கு இது ஒரு பெரிய ரயில்வே திட்டமாகும். எனவே, வரும் மத்திய பட்ஜெட்டில், இத்திட்டத்திற்கு கூடுதல் நிதி ஒதுக்கி, விரைந்து செயல்படுத்த வேண்டும். இவ்வாறு அவர்கள் கூறினர்.
இதுகுறித்து ரயில்வே அதிகாரிகள் கூறுகையில், ”சென்னை – கடலூர் (பாதை: மகாபலிபுரம், புதுச்சேரி) ரயில் திட்டத்திற்கு அதிக நிதி தேவைப்படுகிறது. மத்திய பட்ஜெட்டில் ஒதுக்கப்பட்ட நிதியில் பணிகளை மேற்கொண்டு வருகிறோம். வரும் பட்ஜெட்டில் இத்திட்டத்திற்கு கூடுதல் நிதி ஒதுக்க வலியுறுத்தி உள்ளோம்.
