லக்னோ: உத்தரபிரதேச மாநிலம் பிரயாக்ராஜ் நகரில் மகா கும்பமேளா நடந்து வருகிறது. மௌனி அமாவாசை (தை அமாவாசை) தினமான கடந்த 29-ம் தேதி, இங்கு கூட்ட நெரிசலில் சிக்கி 30 பேர் உயிரிழந்தனர். 60 பேர் படுகாயமடைந்தனர். உயிரிழந்தவர்களின் குடும்பங்களுக்கு தலா ரூ.25 லட்சம் இழப்பீடு வழங்கப்படும். விபத்து குறித்து நீதி விசாரணை நடத்தப்படும் என முதல்வர் யோகி ஆதித்யநாத் அறிவித்துள்ளார்.
அவரது உத்தரவின் பேரில் தலைமை செயலாளர் மனோஜ்குமார் சிங், டிஜிபி பிரசாந்த் குமார் ஆகியோர் நேற்று பிரயாக்ராஜில் ஆய்வு நடத்தினர். கூட்ட நெரிசல் குறித்து விசாரிக்க நீதிபதி ஹர்ஷ் குமார் தலைமையில் சிறப்பு ஆணையம் அமைக்கப்பட்டுள்ளது. முன்னாள் போலீஸ் அதிகாரி வி.கே. குப்தா மற்றும் முன்னாள் ஐஏஎஸ் அதிகாரி டி.கே. சிங் கைது செய்யப்பட்டுள்ளனர். விசாரணையை தொடங்க அவர்கள் இன்று பிரயாக்ராஜ் செல்லவுள்ளனர்.
இதற்கிடையில், முதல்வர் யோகி ஆதித்யநாத் நேற்று காலை பிரயாக்ராஜ், வாரணாசி மற்றும் பிற மாவட்டங்களின் கலெக்டர்கள் மற்றும் காவல்துறை அதிகாரிகளுடன் வீடியோ கான்பரன்சிங் மூலம் முக்கிய ஆலோசனை நடத்தினார். அவரது உத்தரவின் பேரில் கும்பமேளா பகுதி முழுவதும் வாகன போக்குவரத்து தடை செய்யப்பட்டுள்ளது. விஐபி பாஸ்கள் முற்றிலுமாக நிறுத்தப்பட்டுள்ளன.
திரிவேணி சங்கமத்தில் நீராடுவதற்கு சாலையும், புனித நீராடிவிட்டு செல்வதற்கு தனி சாலையும் அமைக்கப்பட்டுள்ளது. பக்தர்கள் பாதுகாப்பாக சொந்த ஊர்களுக்கு ரயில் மற்றும் பேருந்து மூலம் அனுப்பி வைக்கப்படுகின்றனர். இந்நிலையில், கும்பமேளாவின் செக்டார்-22-ல் நேற்று ஏற்பட்ட தீ விபத்தில் 15 கூடாரங்கள் எரிந்து நாசமானது. உடனடியாக தீ அணைக்கப்பட்டதால் அசம்பாவிதம் ஏதும் ஏற்படவில்லை. மேலும் விசாரணை நடந்து வருகிறது.
