புதுடெல்லி: கர்நாடக முதல்வர் சித்தராமையா, துணை முதல்வர் டி.கே. சிவக்குமார், தெலுங்கு தேசம் கட்சியின் மாநிலத் தலைவர் பல்லா சீனிவாச ராவ், ஒய்எஸ்ஆர் காங்கிரஸ் தலைவர் ஜெகன் மோகன் ரெட்டி ஆகியோர் சென்னையில் நடைபெறும் நாடாளுமன்றத் தொகுதி மறுவரையறை தொடர்பான கூட்டு நடவடிக்கைக் குழுக் கூட்டத்தில் பங்கேற்க உள்ளனர்.
நாடாளுமன்ற தொகுதி மறுவரையறை தொடர்பான ஆலோசனைக் கூட்டத்தை வரும் 22-ம் தேதி சென்னையில் நடத்த திமுக திட்டமிட்டுள்ளது. நாடாளுமன்ற தொகுதி மறுவரையறையில் மக்கள் தொகை அடிப்படையில் நாடாளுமன்ற தொகுதிகளை ஒதுக்கினால், குறைந்த மக்கள் தொகை கொண்ட தமிழ்நாடு, கேரளா, ஆந்திரா, தெலுங்கானா, கர்நாடகா, பஞ்சாப், ஒடிசா ஆகிய 7 மாநிலங்களின் மக்களவையில் பிரதிநிதித்துவம் குறையும் என்று திமுக கூறுகிறது.
இதுகுறித்து, முதல்வர் மு.க. ஸ்டாலின் கடந்த 5-ம் தேதி சென்னையில் அனைத்து கட்சி கூட்டத்தை கூட்டினார். இதில், தமிழகத்தில் பதிவு செய்யப்பட்ட அரசியல் கட்சிகள் பங்கேற்க அழைப்பு விடுக்கப்பட்டது. இதில், மக்கள் தொகை அடிப்படையிலான எல்லை நிர்ணயத்தால் ஏற்படும் பாதிப்புகள் குறித்தும், அதில் எடுக்கப்படும் முடிவுகள் குறித்தும் ஆலோசிக்க, கூட்டு நடவடிக்கை குழு அமைக்க தீர்மானம் நிறைவேற்றப்பட்டது. இதையடுத்து, முதல்வர் மு.க. ஸ்டாலின் சென்னையில் மார்ச் 22-ல் நடக்கும் ஆலோசனை கூட்டத்தில் பங்கேற்க, அந்தந்த மாநில முக்கிய கட்சி தலைவர்களுக்கு அழைப்பு விடுத்து கடிதம் எழுதியுள்ளார்.
இந்நிலையில், நேற்று முதல், முதல்வரின் அழைப்பை நேரில் தெரிவிக்க, முதல்வரின் பிரதிநிதிகள் என, பல்வேறு மாநிலங்களுக்கு, தி.மு.க., மூத்த தலைவர்கள் செல்ல துவங்கியுள்ளனர். நேற்று ஒடிசா தலைநகர் பவனேஷ்வர் சென்ற திமுக எம்பி தயாநிதி மாறன் மற்றும் தமிழக அமைச்சர் டிஆர்பி ராஜா ஆகியோர் அம்மாநில எதிர்க்கட்சி தலைவரும், முன்னாள் முதல்வருமான நவீன் பட்நாயக்கை சந்தித்து மு.க.ஸ்டாலினுக்கு நேரில் அழைப்பு விடுத்தனர்.
பின்னர் செய்தியாளர்களிடம் பேசிய தயாநிதி மாறன், “மார்ச் 22-ம் தேதி நடைபெறும் ஆலோசனைக் கூட்டத்தில் பங்கேற்பேன். எங்களுடன் போராடுவேன் என்று நவீன் பட்நாயக் கூறியுள்ளார்” என்றார். இவ்வாறு அவர் கூறினார். இந்நிலையில், திமுக அமைச்சர் எ.வ. வேலுவும், திமுக எம்பி வில்சனும் இன்று ஆந்திரா சென்றனர். ஒய்எஸ்ஆர் காங்கிரஸ் கட்சித் தலைவர் ஜெகன் மோகன் ரெட்டி, தெலுங்கு தேசம் கட்சியின் மாநிலத் தலைவர் பல்லா சீனிவாசராவ் ஆகியோரை சந்தித்து மார்ச் 22-ம் தேதி நடைபெறும் ஆலோசனைக் கூட்டத்தில் பங்கேற்குமாறு அழைப்பு விடுத்தனர்.
இதேபோல் அமைச்சர் பொன்முடி, அப்துல்கலாம் எம்பி அடங்கிய மற்றொரு குழு இன்று கர்நாடகா சென்றது. இந்த குழுவினர் முதல்வர் சித்தராமையா மற்றும் துணை முதல்வர் டி.கே. சிவக்குமார் அவர்களை அனைத்து கட்சி கூட்டத்தில் பங்கேற்க அழைத்தார்.
