தர்மபுரி: தர்மபுரி மாவட்டத்தில் கடந்த 2 வாரங்களாக வடகிழக்கு பருவமழை பரவலாக பெய்து வருகிறது. வாணியாறு அணையின் நீர்பிடிப்பு பகுதியில் பெய்த மழையால் அணை நிரம்பியது. தொடர் மழையால் வரட்டாறு, ஈச்சம்பாடி அணைகள் நிரம்பின.
சின்னாறு, தொப்பையாறு, நாகாவதி, கேசர்குழி அணைகளுக்கு தண்ணீர் வரத்து உள்ளது. தும்பலஅள்ளி அணையில் மழைநீர் குளம் போல் தேங்கி நிற்கிறது. தர்மபுரி மாவட்டத்தில் உள்ள ஒரு அணையை தவிர மற்ற 7 அணைகளில் நீர் இருப்பு உள்ளதால் அணையை சுற்றியுள்ள விவசாய நிலங்களில் உழவு பணி தீவிரமாக நடந்து வருகிறது.
சில இடங்களில் நெல் நாற்று சாகுபடி தீவிரமாக நடந்து வருகிறது. தர்மபுரி, பென்னாகரம், பாலக்கோடு, நல்லம்பள்ளி, மாரண்டஅள்ளி, பாப்பிரெட்டிப்பட்டி, மொரப்பூர், பொம்மிடி உள்ளிட்ட பகுதிகளில் நெல் சாகுபடி பணி தீவிரமாக நடந்து வருகிறது. தர்மபுரி மாவட்டத்தில் ஆடுதுறை-39, நெல் ஏடிடி-53, ஆடுதுறை-54, கோ-51, கோ-54, கோ-55, டிகேஎம்-13, வெள்ளைப்பொன்னி, விஜிடி-1 உள்ளிட்ட ரகங்கள் சாகுபடியில் விவசாயிகள் ஈடுபட்டுள்ளனர்.
கடுக்கப்பட்டி, பாடி, பாப்பாரப்பட்டி, நாகாவதி அணை, பஞ்சப்பள்ளி, வாணியாறு, தொப்பியாறு, கேசர் குழி போன்ற பகுதிகளில் தோட்டப்பணிகள் தீவிரமாக நடந்து வருகிறது. இதற்காக 32 டன் விதை நெல் இருப்பு வைக்கப்பட்டுள்ளது. மானாவாரி நிலத்தில் ராகி, உளுந்து, சாமை, கம்பு, சோளம் பயிரிடப்படுகிறது. இதற்காக, 90.53 டன் விதை பயிர்கள் ஈர்ப்பு செய்யப்பட்டுள்ளன. துவரை, உளுந்து, பச்சை பயறு, காராமணி, கொள்ளு, கொண்டக்கடல் போன்ற பயறு வகைகளை சாகுபடி செய்ய 66,710 டன் விதை இருப்பு வைக்கப்பட்டுள்ளது.
13.19 டன் நிலக்கடலை விதைகள் மட்டுமே இருப்பு வைக்கப்பட்டுள்ளன. இதுகுறித்து விவசாயிகள் கூறுகையில், தர்மபுரி மாவட்டத்தில் தற்போது வடகிழக்கு பருவமழை பெய்து வருவதால் நெல் சாகுபடியில் தீவிரமாக ஈடுபட்டுள்ளனர். ஆனால் நெல் நடவு செய்ய போதிய ஆட்கள் இல்லை. நெல் சாகுபடிக்கு ஆள் பற்றாக்குறையால், குறிப்பிட்ட காலத்திற்குள் நெல் சாகுபடி தாமதமாகிறது.
எனவே, தேசிய ஊரக வேலை வாய்ப்பு திட்டத்தின் கீழ் மேற்கொள்ளப்படும் பணிகளை தற்காலிகமாக நிறுத்தி வைக்க வேண்டும். அங்கு பணிபுரியும் தொழிலாளர்களை விவசாய வேலைக்கு அனுப்பினால் தான் நெல் நடவு பணி நடக்கும். இல்லையெனில் விவசாய பணிகள் பாதிக்கப்படும், என்றார். அதிகாரிகள் கூறுகையில், தர்மபுரி மாவட்டத்தில் ஆண்டு சராசரி மழையளவு 942 மி.மீ. ஆனால் இதுவரை 573.38 மி.மீ மழை பெய்துள்ளது.
குறிப்பாக கடந்த இரண்டு வாரங்களாக பரவலாக மழை பெய்து வருகிறது. இதனால் அணைகளுக்கு தண்ணீர் வரத்து உள்ளது. அணைகளை சுற்றியுள்ள பகுதிகளில் நெல் சாகுபடி தீவிரமாக நடந்து வருகிறது. தர்மபுரி மாவட்டத்தில் இந்த ஆண்டு 18,500 ஹெக்டேரில் நெல் சாகுபடி செய்ய இலக்கு நிர்ணயம் செய்யப்பட்டுள்ளது. ஆனால் இதுவரை 12,500 ஹெக்டேரில் மட்டுமே நெல் சாகுபடி செய்யப்பட்டுள்ளது.
ஆட்கள் பற்றாக்குறையால் விவசாய பணிகள் மந்தமடைந்துள்ளதாக விவசாயிகள் தெரிவிக்கின்றனர்.
