சென்னை: மஞ்சள் காமாலை நோயால் பாதிக்கப்பட்டு துணை நடிகர் ஜெயசீலன் காலமானார்.
தனுஷ் நடித்த ‘புதுப்பேட்டை’, ‘பிகில்’, ‘விக்ரம் வேதா’ உள்ளிட்ட பல படங்களில் துணை நடிகராக நடித்தவர் ஜெயசீலன். அட்லீ இயக்கத்தில் விஜய் நடித்த ‘தெறி’ படத்தில் பள்ளிக்கூடத்தில் இருக்கும் ரவுடிகளை விஜய் பாடம் நடத்தி விரட்டி அடிக்கும் காட்சியில் “ட்விங்கிளு ட்விங்கிளு சூப்பர் ஸ்டாரு.. அவ்வையார்.. வாத்தியார்” என தப்புத் தப்பாக ரைம்ஸ் பாடி காமெடி செய்யும் அடியாளாக நடித்து இருந்தார்.
இந்நிலையில், மஞ்சள் காமாலை பாதிப்பால் சிகிச்சை பெற்று வந்த ஜெயசீலன் (40) சிகிச்சை பலனின்றி உயிரிழந்துள்ளார். சென்னை புதுவண்ணாரப்பேட்டையில் திருமணம் செய்துகொள்ளாமல் வசித்த வந்த ஜெயசீலன், ஸ்டான்லி மருத்துவமனையில் சிகிச்சை பெற்று வந்தார். சிகிச்சை பலனின்றி ஜெயசீலன் உயிரிழந்த சம்பவம் திரையுலகினரை அதிர்ச்சியில் ஆழ்த்தியுள்ளது.
