வால்மீகி முனிவரின் வாழ்க்கை வரலாறு என்றும், பிரபல இந்தி நடிகர் அக்ஷய் குமார் வால்மீகியாக நடிக்கப் போவதாகவும் கூறி கடந்த மாதம் ஒரு வீடியோ வெளியிடப்பட்டது. அதில் வால்மீகி வேடத்தில் அக்ஷய் குமார் நடிக்கும் காட்சிகள் இடம்பெற்றிருந்தன. இதைக் கண்டு அக்ஷய் குமார் அதிர்ச்சியடைந்தார். இது செயற்கை நுண்ணறிவால் உருவாக்கப்பட்ட போலி வீடியோ என்றும், இதை சமூக ஊடகங்களில் பகிர வேண்டாம் என்று ரசிகர்களைக் கேட்டுக்கொண்டார்.
இந்த சூழ்நிலையில், இந்த போலி வீடியோக்களை நீக்கக் கோரி அக்ஷய் குமார் மும்பை உயர் நீதிமன்றத்தில் வழக்குத் தொடர்ந்தார். வழக்கை விசாரித்த நீதிபதி ஆரிஃப் டாக்டர் தலைமையிலான அமர்வு, AI-ல் உருவாக்கப்பட்ட போலி வீடியோக்களை அனைத்து தளங்களிலிருந்தும் நீக்க உத்தரவிட்டுள்ளது. “AI-ல் உருவாக்கப்பட்ட போலி வீடியோக்கள் சமூகத்திற்கு பெரும் அச்சுறுத்தலாக உள்ளன. அவை மிகவும் யதார்த்தமாகத் தோன்றுவதால், உண்மையானவை மற்றும் போலியானவை என்பதை வேறுபடுத்துவது கிட்டத்தட்ட சாத்தியமற்றதாகிவிட்டது.
இது தனிப்பட்ட நலனுக்கு மட்டுமல்ல, பொது நலனுக்கும் எதிரானது. இதுபோன்ற உள்ளடக்கம் சமூகத்தில் தவறான புரிதல்களையும் விரோதத்தையும் உருவாக்குவதால், அதை உடனடியாக பொது தளங்களில் இருந்து அகற்ற வேண்டும், ”என்று நீதிபதிகள் கூறினர். முன்னதாக, அக்ஷய் குமார் தரப்பில் ஆஜரான மூத்த வழக்கறிஞர் பிரேந்திர சரஃப், செயற்கை நுண்ணறிவால் உருவாக்கப்பட்ட வீடியோக்கள் வேகமாகப் பரவுவது திரைக் கலைஞர்களுக்கு தீங்கு விளைவிக்கும் என்று கூறினார்.
இது எதிர்காலத்தில் போலிச் செய்திகள் மற்றும் சைபர் குற்றங்களின் புதிய முகமாகவும் மாறக்கூடும் என்றும் அவர் கூறினார். இதை ஏற்றுக்கொண்ட நீதிமன்றம், இதுபோன்ற வழக்குகளில் கடுமையான கண்காணிப்பு மற்றும் தொழில்நுட்பக் கட்டுப்பாடு அவசியம் என்று கூறியது.
