சினிமாவில் ஆரம்பத்தில் சிறிய வேடங்களில் நடித்த சூரி, வெண்ணிலா கபடி குழு படத்தால் பெரிய வெளிச்சத்திற்குக் கொண்டு வரப்பட்டார். இந்தப் படத்திலிருந்து அவர் முன்னணி காமெடி நடிகராக மாறினார். தொடர்ந்து விஜய், அஜித், ரஜினிகாந்த் உள்ளிட்ட முன்னணி நடிகர்களுடன் நடித்திருக்கிறார்.
வெற்றிமாறன் இயக்கிய விடுதலை படத்தில் கதாநாயகனாக அறிமுகமாகி, தனது திறமையை நிரூபித்தார். அதன்பிறகு கருடன், கொட்டுக்காளி, விடுதலை 2 ஆகிய படங்களில் நடித்தார். தற்போது ஏழு கடல் ஏழு மலை, மாமன் ஆகிய படங்களில் நடித்து வருகிறார்.
சமீபத்தில் சுசீந்திரன், சூரியை சந்தித்து ஒரு புதிய கதையை கூறியதாக தகவல் வெளியானது. ஆனால், தயாரிப்பாளர்கள் இந்தக் கூட்டணியை ஏற்க மறுக்கிறார்கள் என்று கூறி சூரி, சுசீந்திரனுடன் வேலை செய்ய முடியாது என்று தெரிவித்ததாக கூறப்படுகிறது.
இந்த செய்தி பரவி ரசிகர்கள் பல்வேறு கருத்துகளை தெரிவிக்கிறார்கள். சிலர், சூரி தன் நண்பர் சிவகார்த்திகேயனின் தயாரிப்பில் சுசீந்திரனை இயக்குநராக வைத்து படம் செய்யலாம் என்று கூறுகிறார்கள். ஆனால், இந்த செய்தியில் எவ்வளவு உண்மை இருக்கிறது என்பது இன்னும் உறுதியாகவில்லை.
