தமிழ் சினிமாவின் முன்னணி நடிகர்களில் ஒருவராக நீண்ட காலமாக திகழ்பவர் சூர்யா. பல வெற்றி படங்களை ரசிகர்களுக்கு அளித்தவர் என்றாலும், சமீபத்தில் அவர் நடித்த சில படங்கள் எதிர்பார்த்த வெற்றியை பெறவில்லை. வித்யாசமான கதாபாத்திரங்களில் தேர்ந்தெடுத்து நடித்தாலும், அந்த முயற்சிகள் எதிரொலி பெறாத நிலையில் சூர்யா ரசிகர்கள் ஏமாற்றத்தில் இருந்தனர்.
இந்நிலையில், கார்த்திக் சுப்புராஜ் இயக்கத்தில் வெளியான “ரெட்ரோ” திரைப்படம் அந்த ஏக்கத்தை போக்கியது. இந்த படம் வெளியான சில தினங்களிலேயே பெரிய வரவேற்பைப் பெற்றது. சூர்யாவின் திரும்புமுனை படம் எனக் கூறப்படும் “ரெட்ரோ”, அவரது நடிப்பு திறனை மீண்டும் அனைவருக்கும் நினைவூட்டியுள்ளது.
திரையரங்குகளில் நல்ல வரவேற்பைப் பெற்ற இப்படம், முதல் நாளிலேயே தமிழகத்தில் 17 கோடி வசூலித்தது. உலகளவில் 46 கோடி வசூலுடன் ஆரம்பித்த படம், மூன்று நாட்களுக்குள் 70 கோடியை தொட்டுவிட்டது. இதனால், சூர்யாவிற்கு இது ஒரு முக்கியமான திரும்புமுனையாக அமைந்திருக்கிறது.
இந்த வெற்றியின் தாக்கத்தில், சூர்யா தற்போது தனது 46வது படத்தில் நடிக்க ஒப்பந்தமாகியுள்ளார். வெங்கி அட்லூரி இயக்கும் இந்த படம் தமிழ் மற்றும் தெலுங்கு இரு மொழிகளிலும் உருவாக உள்ளது. தெலுங்கில் பிரபலமான சிதாரா என்டர்டைன்மெண்ட் நிறுவனம் இந்த படத்தை தயாரிக்கிறது.
சமீபத்தில் நடந்த “ரெட்ரோ” ப்ரீ ரிலீஸ் விழாவில் சூர்யா இந்த தகவலை உறுதிப்படுத்தியிருந்தார். புதிய படம் குறித்த அறிவிப்பு ரசிகர்களிடம் மேலும் எதிர்பார்ப்பை கூட்டியுள்ளது.
மேலும் “ரெட்ரோ” பட வெற்றிக்கு பிறகு, சூர்யாவின் சம்பளத்திலும் பெரும் உயர்வு ஏற்பட்டுள்ளது. தகவலின்படி, அவர் இந்த படத்திற்காக 35-40 கோடி சம்பளமாக பெற்றதாக கூறப்படுகிறது. புதிய படத்திற்கு அவர் வாங்கும் சம்பளம் 45 முதல் 50 கோடி வரை இருக்கும் என வட்டாரங்களில் தகவல் பரவியுள்ளது.
இது வரை எந்த அதிகாரப்பூர்வ அறிவிப்பும் வெளியிடப்படவில்லை என்றாலும், ரெட்ரோ வெற்றியால் சூர்யா மீண்டும் முன்னணி வரிசையில் தன்னை நிலைநாட்டியுள்ளார். இதனால், அவரது ரசிகர்கள் மிகுந்த உற்சாகத்தில் இருக்கின்றனர்.
