கோடை விடுமுறையை அனுபவிக்க கன்னியாகுமரி மாவட்டம் வரும் சுற்றுலா பயணிகள், அழகிய காட்சிகளுடன், அங்குள்ள சிறப்பு உணவுகளையும் விரும்பி அனுபவிக்கின்றனர். அந்த வகையில் தற்போது அதிகம் கவர்ச்சி பெறும் ஒரு உணவு வகை முந்திரிக்கொத்து ஆகும். இந்த இனிப்பு வகை, தனித்துவமான ருசியாலும், சத்தும் நிறைந்துள்ளதாலும், பாரம்பரிய உணவாக பெருமை பெறுகிறது.
விருந்துகளில் பரிமாறப்படும் பல இனிப்பு வகைகளில், முந்திரிக்கொத்து தனி இடம் பெற்றுள்ளது. இது முதன்மையாக சிறுபயிறு, தேங்காய், ஏலக்காய், சுக்கு மற்றும் கருப்பட்டி கொண்டு தயாரிக்கப்படுகிறது. இதில் பயன்படுத்தப்படும் கருப்பட்டி, இயற்கை சக்கரை வகையாக, உடலுக்கு நன்மை செய்யக்கூடியது. சிறுபயிறும் புரதச் சத்து நிறைந்ததாக இருப்பதால், இது ஒரு ஆரோக்கியமான இனிப்பாக அமைகிறது.
முந்திரிக்கொத்தை தயாரிக்கும் முறை பாரம்பரிய கலைக்கு இணையானதாகும். முதலில் தேங்காயை நன்கு வறுக்கவும்; பின்னர் கருப்பட்டி கொண்டு பாகு தயார் செய்யப்படுகிறது. இதனுடன் சுக்கு, ஏலக்காய் சேர்த்து ஒரு உருண்டை வடிவத்தில் முந்திரிக்கொத்து செய்யப்பட்டு, இரண்டு நாட்கள் காயவைக்கப்படுகிறது. இது அதன் சுவையை நீடிக்கச் செய்யும்.
அதற்குப் பிறகு, அரிசி மாவில் மஞ்சள் தூள் கலந்து, இதில் முந்திரிக்கொத்தை முக்கி, சூடான தேங்காய் எண்ணெயில் பொரிக்கப்படுகிறது. இதன் மூலம் உருவாகும் முந்திரிக்கொத்து, சுவை மட்டுமின்றி நம் பாரம்பரிய உணவுப் பழக்கங்களையும் பிரதிபலிக்கிறது. இந்த உருண்டைகள் 15 நாட்கள் வரை பசையில்லாமல் பாதுகாக்கப்படும்.
இப்போது கோடை விடுமுறைக்காக குடும்பத்துடன் பயணிக்கும் சுற்றுலா பயணிகள், குமரி மாவட்டத்தின் தின்பண்ட கடைகளில் இந்த முந்திரிக்கொத்தை வாங்கி ரசித்து வருகின்றனர். ஒரு பக்கம் சுற்றுலா மகிழ்ச்சி, மற்றொரு பக்கம் பாரம்பரிய உணவின் சுவை என்ற இரட்டை மகிழ்ச்சியோடு அவர்கள் வீடு திரும்புகின்றனர்.
முந்திரிக்கொத்து போன்ற பாரம்பரிய இனிப்புகள், இன்று நவீன உணவுப் பழக்கங்களிடையே இழக்கப்பட்ட சுவைகளையும் மீட்டெடுக்க உதவுகின்றன. இது சுகாதாரமான உணவுகளை விரும்பும் நவீன தலைமுறையிலும் நல்ல வரவேற்பைப் பெற்றுள்ளது.
