இஸ்லாமாபாத்: 2025 சாம்பியன்ஸ் டிராபி தொடரில் இருந்து பாகிஸ்தான் விலகலாம் என்ற தகவல் அதிர்ச்சியை ஏற்படுத்தியுள்ளது. 2025 சாம்பியன்ஸ் டிராபி தொடரை பாகிஸ்தான் நடத்துகிறது. அதற்காக பாகிஸ்தான் கிரிக்கெட் அமைப்பு தங்கள் நாட்டில் உள்ள கிரிக்கெட் மைதானங்களை சீரமைக்கும் பணியை முடித்துள்ளது.
இந்நிலையில், சாம்பியன்ஸ் டிராபி தொடரில் பங்கேற்கும் 8 அணிகளில் முக்கிய அணியான இந்தியா, பாகிஸ்தான் செல்ல இந்திய அரசு அனுமதிக்கவில்லை என்று தெரிவித்துள்ளது. இதன் மூலம் சாம்பியன்ஸ் டிராபி தொடர் பாகிஸ்தானில் நடந்தால் அதில் இந்தியா பங்கேற்காது என பிசிசிஐ மறைமுகமாக தெரிவித்துள்ளது.
அதனால், மற்ற நாடுகளில் போட்டிகளை மட்டும் நடத்த வேண்டிய கட்டாயத்தில் இந்தியா உள்ளது. ஆனால் பாகிஸ்தான் கிரிக்கெட் வாரியம் அதற்கு சம்மதிக்காமல் சர்வதேச கிரிக்கெட் கவுன்சிலுடன் மல்லுக்கட்டி வருகிறது. இந்த தொடரில் இருந்து இந்தியா வெளியேறினால் அது மிகப்பெரிய இழப்பாகும்.
இந்தியா விளையாடுவதால் இந்தத் தொடருக்கான ஒளிபரப்பு உரிமம் பல நூறு கோடிக்கு விற்கப்பட்டுள்ளது. எனவே இந்த தொடரில் இந்தியா பங்கேற்கவில்லை என்றால் அது பல்வேறு பிரச்சனைகளை ஏற்படுத்தும். எனவே இந்தியா விளையாடும் போட்டிகளை மட்டும் துபாயில் நடத்தலாம் என சர்வதேச கிரிக்கெட் கவுன்சில் பரிந்துரைத்துள்ளது. அதற்கு பாகிஸ்தான் கிரிக்கெட் வாரியம் சம்மதிக்கவில்லை.
மாறாக, இந்தியா ஏன் பாகிஸ்தானுக்கு வர மறுக்கிறது? விளக்கம் கேட்கிறது. இந்நிலையில் சாம்பியன்ஸ் டிராபி தொடரை பாகிஸ்தானில் இருந்து வேறு நாட்டுக்கு மாற்ற சர்வதேச கிரிக்கெட் கவுன்சில் முயற்சித்து வருவதாக கூறப்படுகிறது. முதல் கட்டமாக தென்னாப்பிரிக்கா தேர்வு செய்யப்பட்டுள்ளது. அவ்வாறு செய்தால், சர்வதேச கிரிக்கெட் கவுன்சில் நடத்தும் உலக கோப்பை தொடரில் பாகிஸ்தான் இனி பங்கேற்காது என தெரிவிக்கப்பட்டுள்ளது. உலகக் கோப்பை தொடரில் இந்தியா-பாகிஸ்தான் போட்டிக்கான வருமானம் மிக அதிகம் என்பது குறிப்பிடத்தக்கது. வருவாய் இழப்பு பெரிய அளவில் இருக்கும் என்றும், இதை ஒரு ஆயுதமாக பயன்படுத்தி சர்வதேச கிரிக்கெட் கவுன்சிலை தங்கள் பக்கம் கொண்டு வர பாகிஸ்தான் முயற்சிப்பதாக கூறப்படுகிறது.
