புது டெல்லி: ஏசி இயந்திரங்களின் இயல்பான வெப்பநிலையை 20 முதல் 28 டிகிரி செல்சியஸ் வரை பராமரிக்க வழிகாட்டுதல்களை உருவாக்குவது குறித்து மத்திய அரசு மாநில அரசுகளுடன் ஆலோசனை நடத்தி வருகிறது. இது தொடர்பாக மத்திய மின்துறை அமைச்சர் மனோகர் லால் கட்டார் செய்தியாளர்களிடம் கூறியதாவது:- புவி வெப்பமடைதலுக்கு முக்கிய காரணமான கார்பன் டை ஆக்சைடு வெளியேற்றத்தைக் குறைக்க நடவடிக்கைகள் எடுக்கப்பட்டு வருகின்றன.
இதன் ஒரு பகுதியாக, ஏர் கண்டிஷனர்களின் (ஏசி) வெப்பநிலையை தரப்படுத்துவது குறித்து உற்பத்தியாளர்கள் மற்றும் மாநில அரசுகளுடன் ஆலோசனை நடத்தி வருகிறோம். ஆலோசனை முடிந்ததும், வழிகாட்டுதல்கள் அதற்கேற்ப இறுதி செய்யப்படும். வழிகாட்டுதல்களை உருவாக்கும் போது அந்தந்த மாநிலங்களின் ஈரப்பதத்தையும் கணக்கில் எடுத்துக்கொள்ள வேண்டும் என்று சில மாநிலங்கள் வலியுறுத்தியுள்ளன. வாகனங்களில் பொருத்தப்பட்ட ஏசிகளை தரப்படுத்துவது குறித்து வாகன உற்பத்தியாளர்களுடன் பேச்சுவார்த்தை நடந்து வருகிறது. இவ்வாறு அவர் கூறினார்.
“நாட்டில் எரிசக்தித் திறனை மேம்படுத்த மத்திய அரசு திட்டமிட்டுள்ளது. வெப்பநிலையை 1 டிகிரி குறைப்பதன் மூலம் கூட, 6% மின்சாரத்தை சேமிக்க முடியும். நாட்டில் கோடிக்கணக்கான ஏசிகள் உள்ளன. இது தவிர, ஒவ்வொரு ஆண்டும் புதிய ஏசிகள் வாங்கப்படுகின்றன. எனவே எவ்வளவு மின்சாரம் சேமிக்க முடியும் என்று கற்பனை செய்து பாருங்கள்” என்று மின்சாரத் துறை செயலாளர் பங்கஜ் அகர்வால் கூறினார். நாட்டின் எரிசக்தித் திறனை மேம்படுத்த, எரிசக்தித் திறன் நிறுவனம் (EEA) ஏசிகளின் இயல்புநிலை வெப்பநிலையை 20 முதல் 28 டிகிரி செல்சியஸ் வரை தரப்படுத்துவதற்கான விதிமுறைகளை வகுப்பதில் பணியாற்றி வருகிறது.
