ஆமதாபாத் விமான விபத்தில் 275 பேர் உயிரிழந்த கோர நிலை உலகளாவிய கவலையை ஏற்படுத்தியுள்ளது. இந்தத் துயர சம்பவம், விமானப் பயண பாதுகாப்பு குறித்த பெரும் கேள்விகளை எழுப்பியுள்ளது. இதனைத் தொடர்ந்து, பயணிகள் மத்தியில் பாதுகாப்பு குறித்த அச்சத்தை குறைக்கும் வகையில், பார்லி., நிலைக்குழுவினர் நேரடியாக விமானப் பயணத்தை மேற்கொள்ள முடிவு செய்துள்ளனர். ‘ஏர் இந்தியா’ விமானத்தில் டில்லியிலிருந்து சிக்கிம் மாநில தலைநகர் கேங்டாக்கிற்கு ஜூன் 29ம் தேதி பயணிக்க அவர்கள் திட்டமிட்டுள்ளனர்.
இந்த குழுவில் விமானியுமான பா.ஜ. எம்.பி. ராஜிவ் பிரதாப் ரூடி உள்ளிட்டோர் உள்ளனர். குழுவின் தலைவர் சஞ்சய் குமார் ஜா (ஐ.ஜ.த.) தலைமையில், விமானப் போக்குவரத்தில் ஏற்பட்டுள்ள சிக்கல்கள், தொழில்நுட்ப பிழைகள் மற்றும் பயணிகளுக்கான பாதுகாப்பு அம்சங்களை ஆய்வு செய்ய நடவடிக்கை எடுக்கப்படுகிறது. விமானங்களில் தொடர்ச்சியாக நேரும் அவசர தரையிறக்கங்கள், தாமதங்கள், ரத்து போன்றவை பயணிகள் நம்பிக்கையை மோசமாக பாதித்துள்ளன. அதனை தீர்க்க, நேரடி அனுபவத்தின் மூலம் அறிக்கையை தயாரிக்க குழு முனைந்துள்ளது.
மேலும், ஜூலை மாதத்தில் நடைபெறவுள்ள கூட்டத்தில், விமானப் போக்குவரத்து அமைச்சகம், பாதுகாப்பு ஆணையம், போயிங், ஏர் இந்தியா உள்ளிட்ட உயர் நிறுவன அதிகாரிகள் கலந்து கொண்டு விளக்கமளிக்க உள்ளனர். ஹெலிகாப்டர் சேவை வழங்கும் தனியார் நிறுவனங்கள், ஓய்வு பெற்ற விமானிகள், முன்னாள் அமைச்சர் உள்ளிட்டோரையும் ஆலோசனைக் கூட்டத்திற்காக அழைக்கப்பட்டுள்ளது. விமான சிக்கல்களை தீர்ப்பதற்கான ஆலோசனைகள் இக்கூட்டத்தில் வரவுள்ளதாக எதிர்பார்க்கப்படுகிறது.
இந்தநிலையில், டி.ஜி.சி.ஏ. (சிவில் விமான போக்குவரத்து இயக்குநரகம்) நாடு முழுவதும் பராமரிப்பு பணிகள், தரை உபகரணங்கள், ஓடுபாதை நிலைமை மற்றும் பாதுகாப்பு வசதிகள் குறித்த ஆய்வை நடத்தியது. பல விமான நிலையங்களில் உள்ள பராமரிப்பு குறைபாடுகள், பாதுகாப்பு கவசம் சேமிப்பு கோளாறுகள் மற்றும் தொழில்நுட்ப பதிவுகள் செய்யப்படாமை போன்றவை கண்டறியப்பட்டுள்ளன. அதனைத் தொடர்புடைய நிறுவனங்களுக்கு எச்சரிக்கை அனுப்பி, உடனடியாக சரி செய்ய உத்தரவு பிறப்பிக்கப்பட்டுள்ளது.
