புதுடில்லி: தேசிய பாதுகாப்பு ஆலோசகராக பணியாற்றி வரும் அஜித் தோவல், 80 வயதினை கடந்தவர். ஐ.பி.எஸ். அதிகாரியாக தனது பணியையும், பின்னர் பிரதமர் மோடிக்கு நெருக்கமான நபராகவும் நாட்டின் பல முக்கிய பாதுகாப்பு நடவடிக்கைகளிலும் ஈடுபட்டவராகவும் இவர் அறியப்படுகிறார். 2014 முதல் தேசிய பாதுகாப்பு ஆலோசகர் பதவியில் இருந்து வந்தார். தற்போது அவர் கவர்னராக நியமிக்கப்பட உள்ளதாக தகவல்கள் வெளியாகி உள்ளன.
மகாராஷ்டிர முதல்வர் தேவேந்திர பட்னவிஸை சந்தித்த அஜித் தோவல், அந்த சந்திப்பின் புகைப்படம் சமூக வலைதளங்களில் பகிரப்பட்டதன் மூலம் அரசியல் வட்டாரங்களில் பரபரப்பை ஏற்படுத்தியுள்ளது. வயதின் காரணமாக உடல் ரீதியான சிக்கல்கள் வந்தாலும், பிரதமர் மோடி அவரை ஓய்வு செய்ய விரும்பவில்லை என்றும், அதனால் கவர்னராக நியமிக்க முடிவு செய்துள்ளதாக கூறப்படுகிறது.
மகாராஷ்டிர மாநிலத்தின் தற்போதைய கவர்னரான சி.பி. ராதாகிருஷ்ணனை மாற்றி, அஜித் தோவலை அந்தப் பதவிக்கு கொண்டு வர முயற்சி மேற்கொள்ளப்படுவதாக அரசியல் வட்டாரங்கள் தெரிவிக்கின்றன. வரும் பார்லிமென்ட் மழைக்கால கூட்டத்தொடருக்கு முன்னதாகவே இந்த நியமனங்கள் நடைபெறும் வாய்ப்பு உள்ளது என்றும் தகவல்கள் தெரிவிக்கின்றன.
அஜித் தோவலின் இப்புதிய பதவிக்கு மக்கள் மத்தியில் எதிர்பார்ப்பு அதிகமாக உள்ளது. அவரைப் பலரும் நாட்டுப்பற்றுள்ள தலைவராக பாராட்டி வருகின்றனர். சிலர் தமிழகத்திற்கு அவர் வர வேண்டும் எனக் கூறி இருக்க, சிலர் எதிர்மறை கருத்துக்களையும் பகிர்ந்துள்ளனர். அதாவது, அவரது நியமனம் அரசியல் மட்டுமல்லாமல், மக்கள் உணர்வுகளிலும் தாக்கத்தை ஏற்படுத்தி உள்ளது.
