வாஷிங்டன்: இந்திய தேர்தல்களில் ஓட்டளிப்பை அதிகரிக்க அமெரிக்கா நிதியுதவி அளித்ததாக கூறப்படும் விவகாரம் தொடர்பாக, தொடர்ந்து நான்காவது நாளாக அதிபர் டொனால்டு டிரம்ப் தனது பேச்சில் குறிப்பிட்டுள்ளார். இந்தியா அமெரிக்காவை தனக்கு சாதகமாக பயன்படுத்திக் கொள்கிறது என அவர் விமர்சித்துள்ளார்.
அமெரிக்க அதிபராக பதவியேற்ற பிறகு, டொனால்டு டிரம்ப் அரசின் செலவினங்களை குறைக்கும் நோக்கில், டி.ஓ.ஜி.இ. என்ற அமைப்பை உருவாக்கினார். இதன் தலைவராக பிரபல தொழிலதிபர் எலான் மஸ்க் நியமிக்கப்பட்டுள்ளார். இந்தியாவில் தேர்தலின்போது ஓட்டுப் பதிவை அதிகரிக்க வழங்கப்பட்ட 182 கோடி ரூபாய் நிதியை நிறுத்துமாறு எலான் மஸ்க் சமீபத்தில் உத்தரவிட்டார். இதனால் இந்திய அரசியல் வட்டாரத்தில் பெரும் சர்ச்சை எழுந்துள்ளது.
அமெரிக்கா வழங்கிய நிதி எதற்காக, எங்கு, எப்படி பயன்படுத்தப்பட்டது என்பது தொடர்பாக விசாரணை நடத்த மத்திய அரசு திட்டமிட்டுள்ளது. இதற்கிடையில், “அமெரிக்கா எந்த நிதியுதவியையும் வழங்கவில்லை, வங்கதேசத்திற்கு (வங்கதேசம்) வழங்கியதை இந்தியாவுக்கு வழங்கியதாக கூறுகின்றனர்” என சில ஊடகங்கள் செய்தி வெளியிட்டன. ஆனால், இந்தியாவில் தேர்தல்களில் ஓட்டுப் பதிவு அதிகரிக்க அமெரிக்கா நிதியுதவி அளித்ததாக டிரம்ப் தொடர்ந்து நான்காவது நாளாக தனது பேச்சில் குறிப்பிட்டுள்ளார்.
கன்சர்வேடிவ் அரசியல் செயல் மாநாட்டில் கலந்து கொண்ட டிரம்ப், இது தொடர்பாக பேசும் போது, “என்னதான் நடக்கிறது? நாம் ஏன் மீண்டும் ஓட்டுச் சீட்டு முறைக்கு மாறக்கூடாது? அதற்கு இந்தியா ஏன் உதவக்கூடாது? இந்தியாவுக்கு நம்முடைய நிதியுதவி தேவையில்லை. அவர்களிடமே அதிக பணம் உள்ளது” என்று தெரிவித்துள்ளார்.
மேலும், “இந்தியாவில் தேர்தலுக்காக நாம் பணம் கொடுக்கிறோம்; ஆனால், அவர்களுக்கு அது தேவையே இல்லை. அவர்கள் நம்மை தங்களுக்கு சாதகமாக பயன்படுத்திக் கொள்கின்றனர். உலகிலேயே அதிக வரியை இந்தியா விதிக்கிறது. இந்தியா 200 சதவீதம் வரை வரி விதிக்கிறது. ஆனால், நாம் அவர்களுடைய தேர்தலுக்காக நிதியை அளித்து வந்துள்ளோம்” என்று அவர் கண்டனம் தெரிவித்துள்ளார்.
இந்த கருத்துக்கள் பெரும் சர்ச்சையை ஏற்படுத்தியுள்ள நிலையில், இந்திய அரசாங்கம் இதுகுறித்து அதிகாரப்பூர்வ விளக்கம் வழங்குமா என்பது கவனிக்கத்தக்கதாக உள்ளது.
