டெல்லியில் காற்று மாசு நாளுக்கு நாள் அதிகரித்து வருகிறது. இந்நிலையில், 10 மற்றும் 12-ம் வகுப்பு தவிர அனைத்து மாணவர்களுக்கும் நேரடி வகுப்புகளுக்கு டெல்லி அரசு ஏற்கனவே தடை விதித்துள்ளது. மேலும், அவர்களுக்கான வகுப்பும் ஆன்லைனில் நடத்தப்பட்டு வருகிறது. இந்நிலையில், டெல்லி மற்றும் அதன் சுற்றுவட்டார பகுதிகளில் காற்று மாசுபாட்டைக் கட்டுப்படுத்த உத்தரவிடக் கோரி உச்ச நீதிமன்றத்தில் தாக்கல் செய்யப்பட்ட மனு நீதிபதிகள் அபய் எஸ்.ஓகா, ஜார்ஜ் மாசிக் ஆகியோர் அடங்கிய அமர்வு முன்பு நேற்று விசாரணைக்கு வந்தது.
அப்போது நீதிபதிகள் தங்கள் உத்தரவில் கூறியிருப்பதாவது:- திங்கள்கிழமை டெல்லியின் காற்றின் தரக் குறியீடு 486 ஆக உயர்ந்தது, இது இந்த சீசனில் மிக மோசமானது. காற்று மாசுபாட்டை கட்டுப்படுத்த உரிய நடவடிக்கை எடுக்காத டெல்லி அரசு கண்டிக்கத்தக்கது. தொடர்ந்து இரண்டாவது நாளாக காற்றின் தரக் குறியீடு தொடர்ந்து நெருக்கடியான நிலையில் உள்ளது. இதனைக் கருத்தில் கொண்டு 10 மற்றும் 12-ம் வகுப்பு மாணவர்களுக்கு நேரடி வகுப்புகள் உடனடியாக அமலுக்கு வரும் வகையில் தடை செய்யப்பட்டுள்ளது.
அவர்களுக்கான வழக்கமான ஆன்லைன் வகுப்புகளுக்கு ஏற்பாடு செய்ய வேண்டும். எக்காரணம் கொண்டும் நீதிமன்றத்தின் அனுமதியின்றி கிராப் 4 இன் விதிகளை டெல்லி அரசு தளர்த்தக் கூடாது. இவ்வாறு நீதிபதிகள் தங்கள் உத்தரவில் கூறியுள்ளனர்.
