விஜயவாடா: நாட்டிலேயே முதன்முறையாக, ஆந்திரப் பிரதேசம் பொது கடல் விமான சேவையை தொடங்க உள்ளது. இதற்கான வெள்ளோட்ட நிகழ்ச்சி விஜயவாடாவில் நேற்று நடந்தது. சிறப்பு விருந்தினர்களாக மாநில முதல்வர் சந்திரபாபு நாயுடு, மத்திய சிவில் விமான போக்குவரத்து துறை அமைச்சர் ராம்மோகன் நாயுடு ஆகியோர் கலந்து கொண்டனர்.
இருவரும் வெள்ளோட்டத்தில் பங்கேற்று கடல் விமானம் மூலம் ஸ்ரீசைலம் சென்றனர். முன்னதாக விமான போக்குவரத்து துறை அமைச்சர் ராம்மோகன் நாயுடு பேசுகையில், “ஒவ்வொரு சாமானியனும் பயணம் செய்யும் வகையில் கடல் விமான சேவை திட்டம் செயல்படுத்தப்படும். இந்த விமானத்தில் 14 பேர் பயணம் செய்யலாம். ஆந்திராவில் 4 தடங்களில் இத்திட்டம் செயல்படுத்தப்படும்.
இந்த சேவை தொடங்கப்படும். அடுத்த 3-4 மாதங்களில் ஆந்திராவில் சுற்றுலாப் பயணிகளின் எண்ணிக்கை அதிகரிக்கும்,” என்றார். ஆந்திர முதல்வர் சந்திரபாபு நாயுடு ஸ்ரீசைலம் சென்று அங்குள்ள மல்லிகார்ஜுனர் கோவிலுக்கு சென்று சிவனை வழிபட்டார். பின்னர் அவர் ஸ்ரீசைலத்தில் செய்தியாளர்களிடம் கூறியதாவது:- கோவில்களை சுற்றுலா தலமாக்க பல்வேறு திட்டங்களை செயல்படுத்த உள்ளோம்.
எதிர்காலத்தில் சுற்றுலாத் துறை மட்டுமே நிலைத்து நிற்கும். நல்லமலை வனப்பகுதியை சுற்றுலா தலமாகவும் மாற்ற குழு அமைக்கப்பட்டுள்ளது. வளர்ச்சியும், மக்கள் நலனும் இந்த அரசுக்கு இரு கண்கள் போன்றது. ஜெகன் ஆட்சியில் கஜானா காலியாக இருந்ததுதான் மிச்சம். மத்திய அரசுடன் கைகோர்க்காமல் இருந்திருந்தால், மூச்சுவிட முடியாத நிலை ஏற்பட்டிருக்கும்.
நதிகள் இணைப்பு திட்டம் மிகவும் முக்கியமானது. முதலில் கோதாவரி, பெண்ணா, வம்சதாரா நதிகளை இணைத்தால் ராயலசீமாவில் வறட்சிக்கு இடமில்லை. போலவரம் அணை கட்டி முடிக்கப்பட்டால் ஆந்திராவில் வறட்சி நீங்கும். விரைவில் உங்கள் அனைவருடனும் ஒரு நல்ல செய்தியை பகிர்ந்து கொள்கிறேன். இவ்வாறு சந்திரபாபு நாயுடு கூறினார்.
