புது டெல்லி: மறைந்த முன்னாள் ஜனாதிபதி ராதாகிருஷ்ணனின் பிறந்தநாளான செப்டம்பர் 5, தேசிய ஆசிரியர் தினமாக கொண்டாடப்படுகிறது. இந்த சந்தர்ப்பத்தில், மத்திய அரசு ஒவ்வொரு ஆண்டும் நல்லாசிரியர் விருதை வழங்கி வருகிறது. இந்த ஆண்டு, நாடு முழுவதும் இருந்து 45 ஆசிரியர்கள் இந்த விருதுக்கு தேர்ந்தெடுக்கப்பட்டுள்ளனர்.
சென்னை மயிலாப்பூர் பி.எஸ். செகண்டரி பள்ளியின் முதல்வர் ரேவதி பரமேஸ்வரன் மற்றும் திருப்பூர் மாவட்டம் உடுமலையில் உள்ள பாரதியார் நூற்றாண்டு அரசு உயர்நிலைப் பள்ளியின் ஆசிரியை விஜயலட்சுமி ஆகியோர் தமிழ்நாட்டிலிருந்து மத்திய அரசின் நல்லாசிரியர் விருதுக்குத் தேர்ந்தெடுக்கப்பட்டுள்ளனர். இன்று டெல்லியில் நடைபெறும் விழாவில் 45 ஆசிரியர்களுக்கு நல்லாசிரியர் விருதை ஜனாதிபதி திரௌபதி முர்மு வழங்க உள்ளார்.
இந்த சூழலில், நேற்று டெல்லியில் உள்ள பிரதமர் நரேந்திர மோடியின் இல்லத்தில் நல்லாசிரியர்களுக்கு சிறப்பு விருந்து வழங்கப்பட்டது. பின்னர், பிரதமர் மோடி அவர்களுடன் கலந்துரையாடினார். அவர் கூறியதாவது:- இந்த ஆண்டு, ஜிஎஸ்டி வரி விகிதத்தில் ஏற்பட்ட மாற்றத்தால் தீபாவளி இரட்டை கொண்டாட்டமாக மாறியுள்ளது. ஜிஎஸ்டி வரி மேலும் எளிமைப்படுத்தப்பட்டுள்ளது. ஜிஎஸ்டி வரியை அமல்படுத்துவது இந்திய பொருளாதாரத்தில் மிக முக்கியமான சீர்திருத்தமாகும். தற்போது, ஜிஎஸ்டி 2.0 வரி விகிதம் நவராத்திரியின் முதல் நாளில் செயல்படுத்தப்பட உள்ளது. இதன்படி, இனிமேல் 5 சதவீதம் மற்றும் 18 சதவீதம் என்ற இரண்டு வரி பிரிவுகள் மட்டுமே அமலில் இருக்கும்.
புதிய வரி விகிதம் சாதாரண மக்களின் வீட்டுச் செலவுகளைக் கணிசமாகக் குறைக்கும். மக்களின் வாழ்க்கைத் தரம் அதிகரிக்கும். அதே நேரத்தில், ஜிஎஸ்டி வரி விகிதத்தில் ஏற்பட்ட மாற்றம் நாட்டின் வளர்ச்சிக்கு மிகப்பெரிய ஊக்கத்தை அளிக்கும். 21 ஆம் நூற்றாண்டில் இந்தியா ஒரு பெரிய சக்தியாக உருவெடுக்கும். செங்கோட்டையில் எனது சுதந்திர தின உரையின் போது, தன்னம்பிக்கை கொண்ட இந்தியா குறித்த எனது கருத்துக்களை வெளிப்படுத்தினேன். இது தொடர்பாக ஆசிரியர்கள் விழிப்புணர்வு பிரச்சாரத்தை வழிநடத்த வேண்டும்.
ஒரு தாய் ஒரு குழந்தையைப் பெற்றெடுக்கிறாள். அந்தக் குழந்தைக்கு கல்வி கற்பிப்பதன் மூலம், ஆசிரியர் அவருக்கு ஒரு பிரகாசமான எதிர்காலத்தை உருவாக்குகிறார். அந்த வகையில், ஆசிரியர்கள் இந்தியாவின் எதிர்காலத்தை வடிவமைக்கின்றனர். நாடு முழுவதும் பணிபுரியும் கோடிக்கணக்கான ஆசிரியர்கள் வளர்ந்த இந்தியாவிற்கு அடித்தளம் அமைத்து வருகின்றனர். அவர்கள் அனைவரையும் நான் வாழ்த்துகிறேன். இவ்வாறு பிரதமர் நரேந்திர மோடி கூறினார்.
