தர்மபுரி: தொடர் கனமழையால், ஒகேனக்கல் காவிரி ஆற்றில் நீர்வரத்து அதிகரித்துள்ளது.
காற்றழுத்த தாழ்வு பகுதியின் தாக்கத்தால் தமிழகத்தில் தற்போது கனமழை பெய்து வருகிறது. கடலோர மாவட்டங்கள் மட்டுமின்றி உள்மாவட்டங்களிலும் மழை பதிவாகி உள்ளது. இந்த தொடர் மழையால் ஆறுகள், ஏரிகள் உள்ளிட்ட நீர்நிலைகள் மிக வேகமாக நிரம்பி வருகின்றன.
இந்நிலையில், ஒகேனக்கல் காவிரி ஆற்றில் நீர்வரத்து இன்று (டிச.14) 8,000 கன அடியாக அதிகரித்துள்ளது. நேற்று இந்த நீர்வரத்து 7,000 கன அடியாக இருந்தது.
மேட்டூர் அணைக்கு முன்பு 6,384 கன அடியாக இருந்த நீர்வரத்து தற்போது 6,198 கன அடியாக குறைந்துள்ளது. அணையின் நீர்மட்டம் 117.57 அடியாகவும், நீர் இருப்பு 89.648 டிஎம்சியாகவும் உள்ளது என அறிவிக்கப்பட்டுள்ளது.
இதனிடையே அணையில் இருந்து 1,000 கன அடி தண்ணீரும், டெல்டா பாசனத்திற்காக கிழக்கு மற்றும் மேற்கு கால்வாய்களில் இருந்து 300 கன அடி தண்ணீரும் திறந்து விடப்படும்.
