திருவனந்தபுரம்: வங்கக்கடலில் உருவான குறைந்த காற்றழுத்த தாழ்வு பகுதி அடுத்த 24 மணி நேரத்திற்குள் மேற்கு-வடமேற்கு நோக்கி நகர்ந்து கிழக்கு மத்திய பிரதேசத்தை சென்றடையும் என இந்திய வானிலை ஆய்வு மையம் அறிவித்துள்ளது. இதன் தாக்கத்தால் கேரளா முழுவதும் செப்டம்பர் 10 வரை கனமழை பெய்யும் என எச்சரிக்கை விடுக்கப்பட்டுள்ளது.
ஏற்கனவே தென்மேற்கு பருவமழை தீவிரமடைந்துள்ள நிலையில், மழை அளவு மேலும் அதிகரிக்கும் என்று வானிலை மையம் தெரிவித்துள்ளது. குறிப்பாக இடியுடன் கூடிய கனமழை பெய்யும் வாய்ப்பு அதிகம் என கணிக்கப்பட்டுள்ளது. மக்கள் எச்சரிக்கையுடன் இருக்குமாறு அறிவுறுத்தப்பட்டுள்ளது.
மாநிலத்தின் 11 மாவட்டங்களுக்கு இன்று கனமழை எச்சரிக்கை விடுக்கப்பட்டுள்ளது. அவை ஆலப்புழா, கோட்டயம், இடுக்கி, எர்ணாகுளம், திரிச்சூர், பாலக்காடு, மலப்புரம், கோழிக்கோடு, வயநாடு, கண்ணூர் மற்றும் காசர்கோடு ஆகும். இந்த மாவட்டங்களில் வெள்ளம் மற்றும் நிலச்சரிவு அபாயம் அதிகரிக்கக்கூடும் என்று அதிகாரிகள் எச்சரித்துள்ளனர்.
கேரள அரசு முன்கூட்டியே மீட்பு மற்றும் நிவாரண நடவடிக்கைகளுக்கான முன்னெச்சரிக்கை ஏற்பாடுகளை மேற்கொண்டுள்ளது. மீனவர்கள் கடலுக்கு செல்ல வேண்டாம் என்று அறிவுறுத்தப்பட்டுள்ளதுடன், பொதுமக்கள் தேவையில்லாமல் வெளியே செல்லாமல் பாதுகாப்பாக இருக்குமாறு கேட்டுக்கொள்ளப்பட்டுள்ளது. அடுத்த சில நாட்களில் மழை தாக்கம் அதிகரிக்கும் என்பதால் மாநிலம் முழுவதும் அவசரகால கண்காணிப்பு ஏற்பாடுகள் வலுப்படுத்தப்பட்டுள்ளன.
