மகாராஷ்டிரா மாநிலத்தில் தேசிய கல்விக் கொள்கை படிப்படியாக அமலாக்கப்படுவதற்கான நடவடிக்கைகள் தொடர்கின்றன. இதன் ஒரு பகுதியாக, அம்மாநில பள்ளிகளில் மூன்றாவது மொழி கற்பது கட்டாயமாக்கப்பட்டுள்ளது. மராத்தி மற்றும் ஆங்கில வழி பள்ளிகளில் 1 முதல் 5ஆம் வகுப்பு வரை பயிலும் மாணவர்களுக்கு மூன்றாவது மொழியாக இந்தி பாடம் சேர்க்கப்படும் என அரசு அறிவித்துள்ளது.
தற்போது இரண்டு மொழிகளை மட்டுமே கற்பித்து வரும் பள்ளிகளிலும் இந்த புதிய நடைமுறை விரைவில் அமலாகும் என அரசாணையில் குறிப்பிடப்பட்டுள்ளது. இதற்காக, மகாராஷ்டிரா முழுவதும் உள்ள 80% ஆசிரியர்களுக்கு புதிய கற்பித்தல் முறைகள் மற்றும் டிஜிட்டல் தளங்களைப் பயன்படுத்தும் முறைகள் குறித்து விரிவான பயிற்சி வழங்கப்படும்.
இந்த அறிவிப்பு, மாநிலத்தில் கல்வி சீர்திருத்தங்களைச் சுட்டிக்காட்டும் வகையில் முக்கியத்துவம் பெறுகிறது. ஏற்கனவே மராத்தி மற்றும் ஆங்கிலம் கட்டாயமாக உள்ள நிலையில், இந்தி மொழியின் சேர்க்கை கல்வித்துறையில் கலந்துரையாடலுக்கு காரணமாகியுள்ளது.
புதிய கல்விக் கொள்கை படிநிலையாக 2025–26 கல்வியாண்டில் தொடங்கப்படும் என்றும், 2028–29ஆம் ஆண்டுக்குள் அனைத்து வகுப்புகளிலும் இது விரிவாக்கப்படும் என தெரிவிக்கப்பட்டுள்ளது.
தமிழ்நாடு உள்ளிட்ட சில மாநிலங்கள், இந்தி மற்றும் சமஸ்கிருதத்தை கல்விக் கட்டமைப்பில் திணிக்கக் கூடாது என எதிர்ப்பு தெரிவித்து வந்த நிலையில், மகாராஷ்டிராவின் இந்த முடிவு கல்வி வரலாற்றில் புதிய பரிசீலனைக்கு வழிவகுக்கிறது.
