மராத்தா சமூகத்தினருக்கு ஓபிசி பிரிவின் கீழ் 10% இடஒதுக்கீடு கோரியும், மராத்தா சமூகத்தினரை குன்பிகளின் துணை சாதியாக அரசு அறிவிக்க வேண்டும் என்றும் கோரியும், மும்பை ஆசாத் மைதானத்தில் ஆகஸ்ட் 29 முதல் மனோஜ் ஜரங்கி காலவரையற்ற உண்ணாவிரதப் போராட்டத்தில் ஈடுபட்டு வருகிறார். இது தொடர்பாக, மராத்தா சமூகத்தினருக்கு குன்பி அந்தஸ்து வழங்குவது மற்றும் ஓபிசி இடஒதுக்கீடு வழங்குவது குறித்து சட்டப்பூர்வ கருத்தைப் பெறப்போவதாக மகாராஷ்டிரா அரசு நேற்று அறிவித்தது.
இந்த நிலையில், ஜாரங்கி நேற்று, “தேவேந்திர ஃபட்னாவிஸ் அரசு போராட்டக்காரர்கள் மீது துப்பாக்கிச் சூடு நடத்தியாலும், தெற்கு மும்பையில் உள்ள ஆசாத் மைதானத்திலிருந்து நான் நகரமாட்டேன். எனது கோரிக்கைகள் நிறைவேற்றப்படும் வரை நான் மும்பையை விட்டு வெளியேறமாட்டேன்.
58 லட்சம் மராத்தாக்கள் குன்பிகளாக இருப்பதாக அரசாங்கத்திடம் பதிவுகள் உள்ளன. அரசாங்கம் கோரிக்கைகளை ஏற்காததால், நாளை முதல் நான் தண்ணீர் குடிப்பதை நிறுத்துவேன். இடஒதுக்கீடு கோரிக்கை நிறைவேற்றப்படும் வரை நான் பின்வாங்க மாட்டேன். என்ன நடந்தாலும், ஓபிசி பிரிவின் கீழ் மராத்தாக்களுக்கு இடஒதுக்கீடு கிடைக்கும். மராத்தாக்கள் குன்பிகளின் துணை சாதி என்று அரசாங்கம் கூற வேண்டும். இடஒதுக்கீடு விரும்புபவர்கள் அதை ஏற்றுக்கொள்வார்கள்.
சட்டப்பூர்வ சிக்கல் இருந்தால், மராத்தாக்களை குன்பிகளாக பொதுமைப்படுத்தாதீர்கள். ஆனால், மராத்தாக்கள் ஓபிசி பிரிவின் கீழ் இடஒதுக்கீடு பெறுவதை யாராலும் தடுக்க முடியாது,” என்று அவர் கூறினார். மராத்தா போராட்டக்காரர்கள் ஆசாத் மைதானம் மற்றும் சுற்றியுள்ள பல்வேறு பகுதிகளையும், அரசு மற்றும் தனியார் அலுவலகங்களையும் ஆக்கிரமித்துள்ளதால், தெற்கு மும்பையில் காலை நேரத்தில் போக்குவரத்து நெரிசல் ஏற்படும் என்று போலீசார் வாகன ஓட்டிகளை எச்சரித்துள்ளனர்.
நடந்து வரும் மராத்தா போராட்டங்கள் குறித்து வர்த்தகர்கள் கவலை தெரிவித்துள்ளனர். தெற்கு மும்பையில் இயல்புநிலையை மீட்டெடுக்கவும், வணிகங்களைப் பாதுகாக்கவும் அரசாங்கம் அல்லது உயர் நீதிமன்றம் தலையிட வேண்டும் என்று வர்த்தகர்கள் சங்கத் தலைவர் வீரேன் ஷா கோரியுள்ளார்.
