பாகிஸ்தானுக்காக உளவு பார்த்ததாக கைது செய்யப்பட்டுள்ள யூடியூபர் ஜோதி மல்ஹோத்ரா தொடர்பான விவரங்கள் புதுடில்லியில் பரபரப்பை ஏற்படுத்தியுள்ளன. ஹரியானாவின் ஹிசார் மாவட்டத்தைச் சேர்ந்த ஜோதி, ‘டிராவல் வித் ஜோ’ என்ற பெயரில் பயணவலைத்தள சேனல் நடத்தி வந்தவர்.
கடந்த 17ம் தேதி பாகிஸ்தான் தொடர்பாக சந்தேகத்திற்கிடமான நடவடிக்கைகளுக்காக அவரை ஹரியானா போலீசார் கைது செய்தனர்.அவரிடம் தேசிய புலனாய்வு அமைப்பு, ராணுவ மற்றும் மாநில புலனாய்வு அதிகாரிகள் தொடர்ந்து விசாரணை நடத்தி வருகின்றனர். ஜோதியின் வாட்ஸாப் உரையாடல்களில், பாகிஸ்தானில் திருமணம் செய்து கொள்ள விருப்பம் தெரிவித்திருந்தது கண்டுபிடிக்கப்பட்டது.
இதன் மூலம் அவரது பாகிஸ்தானுடன் நெருக்கம் புதிய பாதையை வெளிச்சம் போட்டுள்ளது.அந்த உரையாடலில், பாகிஸ்தான் உளவுத்துறை ஐ.எஸ்.ஐ. அதிகாரியான அலி ஹசனுடன் ஜோதி தொடர்ச்சியாக தொடர்பில் இருந்தது தெரிய வந்துள்ளது. அவரிடம், பாகிஸ்தானில் திருமணம் செய்ய விருப்பமுள்ளது என ஜோதி தெரிவித்துள்ளார். அலி ஹசனும் பதிலளிக்கையில், அவரது மகிழ்ச்சிக்காக வாழ்த்து தெரிவித்திருந்தார்.அதேவேளை, பாக். தூதரகத்தில் பணியாற்றிய டேனிஷ் என்பவரும் உளவுத்துறைக்காக வேலை செய்ததாக குற்றச்சாட்டு எழுந்து, மத்திய அரசு அவரை நாடு கடத்தியது.
ஜோதி மற்றும் டேனிஷ் ஒருவருக்கொருவர் நெருங்கிய பழக்கம் இருந்ததோடு, திருமணம் செய்துகொண்டதாக சமூக ஊடகங்களில் தகவல்கள் வெளியாகியுள்ளன.ஜோதியின் பயண விவரங்கள், நிதி பரிவர்த்தனைகள் மற்றும் டிஜிட்டல் சாதனங்கள் அனைத்தும் தற்போது தீவிர சோதனையில் உள்ளன.
பாகிஸ்தானுக்கான அவரது தொடர்பு, தனிப்பட்ட விருப்பங்களாக இருந்ததா அல்லது திட்டமிட்ட உளவுச் செயல்களா என்பது தற்போது விசாரணையின் மையமாக உள்ளது.இந்த தகவல்கள் இந்திய பாதுகாப்புத் துறைகளில் அதிர்வை ஏற்படுத்தியுள்ளன. அவரது நடவடிக்கைகள், இந்திய அரசியல் மற்றும் பாதுகாப்பு சூழ்நிலையில் கவலையை தூண்டும் வகையில் இருப்பதாக அதிகாரிகள் தெரிவித்துள்ளனர். மேலும் விசாரணைகள் தொடர்ந்து நடைபெற்று வருகின்றன.
